ရွှေဖီမြေ၊ စက်တင်ဘာ ၃ ရက်၊ လောက်ကိုင်
ကိုးကန့်တပ်မတော်- MNDAA က ကျောင်းမုန့်ဈေးတန်းတွေမှာ ကျန်းမာရေးနဲ့ မညီညွတ်တဲ့ တရုတ်စာသားနဲ့တံဆိပ်ပါ သရေစာမုန့်(Junk Food) ရောင်းချတာကို တားမြစ်ပိတ်ပင်လိုက်ပါတယ်။
ကိုးကန့်တပ်ရဲ့ ပညာရေးဌာနနဲ့ကျန်းမာရေးဌာနတို့ ပူးပေါင်းပြီး စက်တင်ဘာ ၁ ရက် ရက်စွဲနဲ့ “ကျောင်းမုန့်ဈေးတန်းများတွင် အန္တရာယ်ရှိ သရေစာ (Junk Food)များ ရောင်းချခြင်းကို တားမြစ်ပိတ်ပင်ခြင်း”ဆိုင်ရာ ကြေညာချက်တစ်ရပ်ကို ထုတ်ပြန်ခဲ့ကြောင်း ကိုးကန့်တပ်ရဲ့ ပြန်ကြားရေးဖြစ်တဲ့ The Kokang သတင်းမှာ ဒီနေ့မနက်က ဖော်ပြလာပါတယ်။
ကလေးငယ်တွေ နေ့စဉ်ဝယ်ယူစားသုံးနေတဲ့ သရေစာမုန့် ၁၀ မျိုးထဲ အသည်းနဲ့ကျောက်ကပ်ကို ထိခိုက်စေနိုင်တဲ့ Sodium Cyclamate (ဓာတုအချိုတု)၊ အာရုံကြော ထိခိုက်စေတဲ့ TBHQ (တာရှည်ခံဆေး)၊ ဉာဏ်ရည်ဖွံ့ဖြိုးမှုကို ထိခိုက်စေတဲ့ Amaranth Red (ဆိုးဆေးနီ)၊ အရိုးအဆစ် ဖွံ့ဖြိုးမှုကို ထိခိုက်စေတဲ့ ဖော့စဖိတ်ဒြပ်ပေါင်း၊ နေ့စဉ်စားသုံးသင့်တဲ့ ပမာဏထက် ပိုမိုလွန်ကဲနေတဲ့ ဆားဓာတ်(Sodium) ပါဝင်နေတယ်လို့ ဆိုပါတယ်။
အမိန့်စာ ထုတ်ပြန်တဲ့ရက်ကစပြီး ၁ လအတွင်း ကြိုတင်သတိပေးကာလ (Provision Period)အဖြစ် သတ်မှတ်ပြီးတော့ ဈေးသည်အနေနဲ့ လက်ကျန်မုန့်ကို အမြန်ဆုံး ရှင်းလင်းဖို့နဲ့ နောက်ထပ်အသစ် ထပ်မံ မှာယူတင်သွင်းခြင်း လုံးဝမပြုလုပ်ဖို့ အသိပေးထားပြီး မလိုက်နာရင် ပြင်းထန်စွာ အရေးယူမှာဖြစ်ကြောင်း ဖော်ပြထားပါတယ်။
တားမြစ်ပိတ်ပင်တဲ့ သရေစာ ၁၀ မျိုးကတော့ La Mo Fang (အစပ်တုံး)၊ KISS TABLETS (အနမ်းချပ်)၊ Su Niu Du (သက်သတ်လွတ် အမဲအူကြမ်း)၊ ဝက်နားရွက်ကြွပ် (香脆辣耳)၊ Yu Mi Chang (ပြောင်းဖူးအူချောင်း)၊ Su Xia Pa Zi (သက်သတ်လွတ် ပင်လယ်ဖားကောင်တု)၊ Xiāng Là Jīn Zhēn Gū (အစပ်မှိုအပ်တို)၊ Wǎnghóng Bàngbàngtiáo (ဝမ်ဟုန် ပန်းပန်းချောင်း)၊ Měi Rì Hǎi Tāi Wèi-Là Piàn (နေ့စဉ်ရေညှိအရသာ အစပ်ချပ်)နဲ့ Duōxīng Lǜshuǎng (ဒေါ့ရှင်း ရွှမ်း အစပ်ချောင်း)တို့ပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
