ဝတ်ရည်၊ မတ်လ ၈ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ်ထဲ စစ်ရှောင်တွေ နေထိုင်တဲ့စခန်းတစ်ခုမှာ ဒရုန်းနဲ့ ဗုံးကြဲတိုက်ခိုက်ခံရလို့ စစ်ရှောင် ၂ ဦး သေဆုံးခဲ့တယ်လို့ ဖြစ်စဉ်သိရှိထားသူ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၅ ရက်မှာ သပိတ်ကျင်းမြို့နယ် မင်းကုန်းကျေးရွာအနီးက ဒေသခံတွေ စစ်ရှောင်တဲ့နေရာကို ဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဆိုပါတယ်။
“၅ ရက်နေ့က စစ်ရှောင်စခန်းကို ကြဲသွားတာပါ။ ဒဏ်ရာရ စာရင်းတော့ အတိအကျ မသိရဘူးဗျ။ သေဆုံးတာက စစ်ရှောင်တွေဆိုတာတော့ သိရပါတယ်”
ဒါ့အပြင် သပိတ်ကျင်းမြို့နယ်ထဲက တကောင်းမြို့ကို စစ်တပ်က ပြန်လည်ထိန်းချုပ်ဖို့ ဆက်လက် ထိုးစစ်ဆင်နေပြီး တကောင်းမြို့အနီးက နေရာတချို့ကို ပြန်လည်ထိန်းချုပ်နိုင်ခဲ့တယ်လို့ စစ်ကောင်စီရဲ့ ဝါဒဖြန့်မီဒီယာတွေမှာ ဖော်ပြထားပါတယ်။
တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်းအပါအဝင် စစ်ကိုင်းနဲ့ မကွေးတိုင်းအတွင်းက နယ်မြေတွေကိုလည်း စစ်တပ်ဟာ မြေပြင်ထိုးစစ် ဆက်တိုက် လုပ်ဆောင်နေသလို လေကြောင်းတိုက်ခိုက်မှု ဆက်လက် လုပ်ဆောင်တာကြောင့် ဒေသခံ ထိခိုက်သေဆုံးမှု နေ့စဉ် ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
