ရွှေဖီမြေ၊ ဒီဇင်ဘာ ၂၉၊ ကျောက်မဲ
စစ်ကောင်စီပြန်လည်ထိန်းချုပ်ထားတဲ့ ကျောက်မဲမြို့အဝင်အထွက်တွေမှာ တောင်ပေါ်ကျေးရွာကနေ ဆင်းလာတဲ့ ကားသမားနဲ့ဒေသခံတွေကို ပစ်မှတ်ထားပြီး ငွေတောင်းကြမ်းနေတယ်လို့ ကြုံခဲ့ရတဲ့ ဒေသခံတွေက ရွှေဖီမြေကို ပြောပါတယ်။
ကျောက်မဲကနေ မိုးကုတ်ဘက်အထွက် တစ်နေရာနဲ့ ကျောက်မဲကနေ မိုင်းငေါ့မြို့အထွက်မှာ အဓိကထား ထောင်ချောက်ဆင်ပြီး ငွေတောင်းနေတာ ဖြစ်တယ်လို့ ဆိုပါတယ်။
“သူတို့က ပုံမှန်မစောင့်ဘူး။ ကုန်ကားလာတာတို့ လူနည်းနည်းများလာပြီတို့ဆို ချက်ချင်းလာစောင့်ပြီးမှ ဖမ်းတာ။ အဓိကကတော့ ငွေတောင်းတာပေါ့။ အချို့ကားဆို ၆သိန်း ၁၀သိန်း အဲလိုပေးရတာ။ ကုန်တင်ကားတွေဆို သူတို့ကိုပေးရတာနဲ့ ဘာမှပြန်မရကြဘူး။ တခါတလေ မစောင့်ဘူးဆိုပြီးသွားလိုက်တာ မိရော။ ဘာတင်တင်ကို ဖမ်းပြီးငွေညှစ်တာ။ ပိုက်ဆံပေးပြီးမှ ပြန်လွှတ်ပေးတာ”လို့ ဆိုပါတယ်။
စစ်ကောင်စီတပ်ဟာ ပြည်ထောင်စုလမ်းမကြီးပေါ်မှာတော့ ငွေတောင်းရမ်းတာတွေ လျော့နည်းပေမယ့် အဓိက တောင်ပေါ်ကျေးရွာကနေ ဆင်းလာတဲ့ ဒေသခံတွေကို အဓိကပစ်တ်မှတ်ထားနေတာ ဖြစ်ပါတယ်။
“မိုးကုတ်ကနေ ကျောက်မဲအဝင်ဆို SSPPဂိတ် ၃ခုဖြတ်ရတယ်။ အဲမှာလည်း ပေးရတယ်။ ပြီးတော့ စကစဂိတ်။ အဲမှာတော့ မှတ်ပုံတင်ကအစ အကုန်စစ်တယ်။ အချို့ဆို ပေးမဖြတ်ဘူး။ ပြန်လှည့်ခိုင်းတယ်။ အချို့ကျတော့ ဖမ်းထားပြီးမှ ငွေနဲ့ပြန်ရွေးခိုင်းတယ်”လို့ ဆိုပါတယ်။
ကျောက်မဲမြို့ရပ်ကွက်တွေထဲမှာလည်း သူခိုးတွေပေါများနေပြီး အဲသူခိုးတွေကို အရေးယူတာမျိုးလည်း မရှိဘူးလို့ ဆိုပါတယ်။
“သူခိုးတွေက အဓိကကတော့ လူမရှိတဲ့အိမ်တွေကို ခိုးတာ။ စကစမြင်တယ်။ ဘာမှမပြောဘူး။ ခိုးတာတို့ဘာတို့ ရပ်ကွက်ကမိဆိုရင်လည်း သူတို့ခိုးတဲ့အိမ်တွေကို ပလောင်စစ်သားတွေနဲ့ စွတ်စွဲပြီး တိုင်တယ်။ အဲတော့ စကစက သူခိုးမဖမ်းဘဲ အဲအိမ်ကို ချိတ်ပြန်လာပိတ်လိုက်တယ်”လို့ နောက်ထပ် သတင်းအရင်းမြစ်တစ်ဦးက ပြောပါတယ်။
ကျောက်မဲမြို့ကို စစ်ကောင်စီတပ်က ပြီးခဲ့တဲ့ ၂၀၂၅ခုနှစ် အောက်တို့ဘာ ၁ရက်မှာ တအာင်းတပ်မတော်(TNLA)ထံကနေ ပြန်လည်သိမ်းပိုက်ယူနိုင်ခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
