အလင်း၊ မေလ ၉ ရက်၊ တီးတိန်
ချင်းပြည်နယ် တီးတိန်မြို့ပေါ်ရှိ တပ်ကုန်းသို့ အင်အား ဖြည့်တင်းဖို့အတွက် စစ်ကောင်စီတပ်ဖွဲ့ဝင် အင်အား ၆၀၀ ခန့်ဟာ မနေ့ မေလ ၈ ရက် ညနေပိုင်းမှာ မြို့ထဲ ထပ်မံ ဝင်ရောက်ကာ နေရာယူထားတယ်လို့ ဒေသခံတွေဆီက သိရပါတယ်။
စစ်ကိုင်းတိုင်း ကလေးမြို့ဘက်ကနေ တက်လာတဲ့ စစ်ကောင်စီ စစ်ကြောင်းဟာ မေလ ၈ ရက် ညနေ ၄ နာရီဝန်းကျင်မှာ တီးတိန်မြို့အဝင်သို့ ရောက်ရှိလာတာပဲ ဖြစ်ပါတယ်။
“မြန်မာပြည်က ရှိသမျှ စစ်သားတွေအကုန်လုံး တီးတိန်မြို့ကို ရောက်လာသလိုပါပဲ။ အင်အားတွေ အတော်များတယ်။ ခြေလျင်နဲ့ ကားရောပဲ။ မြို့ထဲမှာလည်း စစ်သားတွေ ခြေရှုပ်နေကြတယ်” လို့ တီးတိန်မြို့ခံတစ်ဦးက ရွှေဖီမြေသို့ ပြောပါတယ်။
စစ်ကောင်စီ စစ်ကြောင်းဟာ မေလ ၁ ရက်ကစပြီး တီးတိန်မြို့ဘက် ဦးတည်ကာ ချီတက်လာတာ ဖြစ်ပြီးတော့ လမ်းခရီးမှာ ချင်းတော်လှန်ရေး ပူးပေါင်းတပ်ဖွဲ့နဲ့ တိုက်ပွဲ ပြင်းထန်စွာ ဖြစ်ပွားခဲ့တယ်လို့ သိရပါတယ်။
ချင်းတော်လှန်ရေးတပ်ဖွဲ့တွေက ခုခံတားဆီးခဲ့ပေမဲ့လည်း စစ်တပ်ဘက်က အင်အားအလုံးအရင်းနဲ့ စစ်ရှိန်မြှင့် တိုက်ခိုက်ခဲ့တာကြောင့် ကနေဒီတောင်စခန်းကို လက်လွှတ်ခဲ့ရပြီး အခုလို မြို့ထဲအထိ ဝင်ရောက်လာတာ ဖြစ်ပါတယ်။
“ကျနော်တို့ လမ်းတစ်လျှောက် ခုခံနေပေမဲ့လည်း စစ်ကောင်စီဘက်က လက်နက်အင်အား၊ လူအင်အားအပြင် လေကြောင်း ပစ်ကူကလည်း အရှိန်မြင့် လုပ်ဆောင်လာတဲ့အတွက် ရက်ရှည် မတားဆီးနိုင်ခဲ့ဘူး” လို့ ရှေ့တန်းစစ်ရေးသတင်းမြစ်က ရွှေဖီမြေသို့ ပြောပါတယ်။
လက်ရှိမှာ စစ်တပ်က မြို့တွင်းမှာ နေရာယူထားတာကြောင့် ဒေသခံတွေအကြား စိုးရိမ်မှု မြင့်တက်နေပါတယ်။
ဒါ့အပြင် မြို့သိမ်းတိုက်ပွဲ ဖြစ်ပွားလာနိုင်တဲ့ အခြေအနေကြောင့် မြို့ခံအများစုဟာ အိန္ဒိယနယ်စပ်နဲ့ ကလေးမြို့ဘက် ကြိုတင်တိမ်းရှောင်နေကြရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
