ယာရူစိင်၊ ဇူလိုင် ၁ ရက်၊ သီပေါ
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် သီပေါမြို့ ဖောင်ဆိပ်ကူးတဲ့နေရာမှာ ဓာတ်ပုံ ရိုက်ကူးတဲ့သူတွေကို စစ်တပ်က ဖမ်းဆီးနေတယ်လို့ သီပေါမြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ၂၀၂၅ ခုနှစ် နိုဝင်ဘာ ၁၄ ရက်မှာ သီပေါတံတားကို စစ်တပ်က ဖြတ်သန်းသွားလာခွင့် ရက်အကန့်အသတ်မရှိ ပိတ်ထားတာကြောင့် ခရီးသွားဒေသခံတွေအနေနဲ့ ဖောင်ဆိပ်ကနေတဆင့် ဖြတ်သန်းသွားလာနေရတာပဲ ဖြစ်ပါတယ်။
“ဖမ်းဆီးမှုတွေ လုပ်တာက ဒီနှစ်ထဲမှ စလုပ်တာ။ တချို့ကျတော့လည်း ဗီဒီယိုရိုက်ပြီး တင်နေကြတာပဲ။ သူတို့ တွေ့ရင်တွေ့သလို ဖမ်းတာ။ မီဒီယာတွေထံ သတင်းပေးဖြစ်မှာဆိုးလို့ ဖမ်းတာတဲ့”
ဇန်နဝါရီကနေ ဇွန်လအထိ ဖောင်ဆိပ်မှာ ခွင့်ပြုချက် မရဘဲ ဓာတ်ပုံနဲ့ ဗီဒီယိုရိုက်တဲ့ ဒေသခံ ၆ ဦး ဖမ်းဆီးခံခဲ့ရတယ်လို့ ဒေသခံတွေက ပြောဆိုပေမဲ့ ရွှေဖီမြေအနေနဲ့ သီးခြားအတည်မပြုနိုင်သေးတာကြောင့် ဆက်လက်စုံစမ်းနေဆဲ ဖြစ်ပါတယ်။
“တံတားပေါ်ကိုတော့ သူတို့ရဲ့အထက်က အရာရှိလူကြီးတွေရဲ့ကားပဲ ဖြတ်သန်းသွားလာလို့ ရတာ။ ကျန်တာဆို ဘာမှမရဘူး။ တခါတလေကျ တွဲကားတွေတော့ သူတို့ပေးသွားတယ်” လို့ နောက်ထပ် မြို့ခံအမျိုးသားတစ်ဦးက ပြောပါတယ်။
ကမ်း ကူးခကို လူတစ်ယောက် ငွေ ၁ သောင်း ကောက်ခံတာဖြစ်ပြီး ယာဉ်တွေတော့ ၂ သောင်းကနေ ၅ သောင်းကျပ်အထိ ကောက်ခံနေတာလို့ ဆိုပါတယ်။
စစ်တပ်နဲ့ ကိုးကန့်တပ်တို့ သီပေါတံတားကို အပြန်အလှန် ပိတ်ထားရာကနေ ဇန်နဝါရီ ၂ ရက်မှာတော့ ကိုးကန့်တပ်က ဂိတ်ကနေ ဆုတ်ပေးခဲ့ပါတယ်။
ခရီးသွား၊ ကားသမားနဲ့ ဒေသခံတွေ သွားလာရေး အဆင်ပြေစေဖို့အတွက် တာဝန်ရှိသူတွေအနေနဲ့ တံတားကို အမြန်ဆုံး ဖွင့်လှစ်ပေးဖို့ ဒေသခံတွေက တောင်းဆိုထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
