ရွှေဖီမြေ၊ မတ်လ ၁၄ ရက်၊ ၁၀၅ မိုင်
ဒီနေ့ ကွတ်ခိုင်မြို့ကို ကိုးကန့်တပ် ထိုးစစ်ဆင်တိုက်ခိုက်နေချိန် မြန်မာ-တရုတ်နယ်စပ် ကျင်စန်းကျော့ရှိ တအာင်းတပ်ရဲ့ အကောက်ခွန်ဌာနနဲ့လုံခြုံရေးအဖွဲ့အများစုကို ဖမ်းဆီးသွားပြီးနောက် ၁၀၅ မိုင်ရှိ တအာင်းတပ်ရဲ့ အုပ်ချုပ်ရေးနဲ့လုံခြုံရေးကိုလည်း ဖမ်းဆီးသွားခဲ့တယ်လို့ ဒေသခံသတင်းရင်းမြစ်က ရွှေဖီမြေကို ပြောပါတယ်။
တအာင်းတပ်ကတော့ ဒီနေ့ မတ်လ ၁၄ ရက် မနက် ၁၁ နာရီဝန်းကျင်မှာ ကိုးကန့်တပ်က ကျင်စန်းကျော့ဂိတ်ရှိ တအာင်းတပ်သား ၄၇ ယောက်နဲ့ သေနတ် ၄၇ လက်ကို ဖမ်းဆီးထိန်းသိမ်းသွားတယ်လို့ တအာင်းတပ်ဘက်က ထုတ်ပြန်ထားပြီး ၁၀၅ မိုင်အခြေအနေကတော့ ရေးသားထားခြင်း မရှိပါဘူး။
“ဖမ်းသွားတဲ့ အရေအတွက်ကတော့ မသိရသေးဘူး။ ရဲရော အုပ်ချုပ်ရေးရော အကုန်ပါတယ်။ ကိုးကန့်က ရှိသမျှလမ်းတွေ အကုန်လုံးပိတ်ပြီး ရုတ်တရက် အကုန်ဝင်ဖမ်းသွားတာ။ ဘာမှမသိလိုက်ဘူး။ အချို့ကတော့ ပြေးနေကြတယ်။ ဖမ်းခံရတဲ့လူတွေလည်း ဖုန်း အကုန်သိမ်းသွားတော့ အဆက်အသွယ် မရဘူး” လို့ သတင်းရင်းမြစ်က ပြောဆိုပါတယ်။
လက်ရှိ ကိုးကန့်တပ်ဟာ ကျင်စန်းကျော့အနီးမှာလည်း ကားတွေနဲ့ အင်အားရာချီ စုဝေးနေပြီး ဘယ်ဘက်သွားမလဲဆိုတာ မသိရသေးဘူးလို့ ဆိုပါတယ်။
ဒီနေ့ညပိုင်းအထိ ကွတ်ခိုင်မြို့ထဲမှာလည်း ပစ်ခတ်သံတွေ ကြားနေရပြီး အခြေအနေ အတိအကျကိုတော့ စုံစမ်းနေဆဲ ဖြစ်ပါတယ်။
လက်ရှိ ပဋိပက္ခနဲ့ပတ်သက်ပြီး တအာင်းတပ်ဘက်က ပစ်ခတ်လို့ တုန့်ပြန်ရတာဖြစ်တယ်လို့ ကိုးကန့်တပ်ဘက်က ပြောဆိုထားပြီး တအာင်းတပ်ကတော့ တွေ့ဆုံဆွေးနွေးရေးနည်းလမ်းနဲ့ အဖြေရှာသွားမယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
