လွေးလာဝ်ဇာရ်၊ ဖေဖော်ဝါရီ ၁၉ ရက်၊ မိုးကုတ်
တရုတ်နိုင်ငံရဲ့ ကြားဝင်စေ့စပ်မှုကြောင့် တအာင်းတပ်မတော် PSLF/TNLA ထံကနေ ပြန်ရခဲ့တဲ့ မန္တလေးတိုင်း မိုးကုတ်မြို့နယ် သစ်ဆိမ့်ကုန်းရွာက အမျိုးသား ၁ ဦး မိုင်းနင်းမိပြီး ခြေတစ်ဖက် ပြတ်ထွက်သွားခဲ့တယ်လို့ မိသားစုဝင်နဲ့ နီးစပ်သူ တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၅ ရက် ညနေ ၅ နာရီခွဲကျော်မှာ ခြံထဲကို ဖော့ဖူး သွားကောက်ရင်းနဲ့ မိုင်းနင်းမိခဲ့တာလို့ ဆိုပါတယ်။
မိသားစုဝင်နဲ့ နီးစပ်သူ တစ်ဦးက “ဟုတ်တယ်။ ရွာနဲ့ အနီးဆုံး ကပ်နေတာက သူ့ခြံပဲ ဆိုတော့။ မိုင်းတွေ မရှိဘူး ပြောလို့ သူသွားတာ။ အရဲစွန့်ပီး အဲ့နေ့မှသွားတာတဲ့။ သူ့ရဲ့ ခြေထောက်တစ်ဖက်တော့ ပြတ်ထွက်သွားတယ်။ ရွာမှာ မိုင်းထိတာ ဒီတစ်ကြိမ်နဲ့ဆို နှစ်ကြိမ်ရှိပြီ။ ရွာကလူတွေ ဘယ်မှမသွားရဲကြဘူး။ ကြောက်နေကြတယ်” လို့ ပြောပါတယ်။
မိုင်းနင်းမိတဲ့သူ အမျိုးသားဟာ အသက် ၄၄ နှစ်အရွယ် ကိုအိုက်စိုင်းဆိုသူဖြစ်ပြီး မိုးကုတ်မြို့ အနောက်ပိုင်း သစ်ဆိမ့်ကုန်းရွာမှာ နေထိုင်သူဖြစ်တယ်လို့ ပြောပါတယ်။
လက်ရှိမှာတော့ ၎င်းမိုင်းနင်းသူအမျိုးသားဟာ မန္တလေးပြည်သူ့ဆေးရုံကြီးမှာသာ ဆေးကုသမှုခံယူနေဆဲ ဖြစ်တာကြောင့် ဆေးကုသဖို့အတွက် အကူအညီလိုအပ်နေတယ်လို့ ဆိုပါတယ်။
ပြီးခဲ့တဲ့ ၂၀၂၅ ခုနှစ် ဒီဇင်ဘာ ၂၉ ရက်တုန်းကလည်း အဲဒီသစ်ဆိမ့်ကုန်းရွာက အသက် ၉ နှစ်အရွယ်ကလေးငယ်တစ်ဦးလည်း မိုင်းနင်းမိခဲ့ပြီး ခြေနှစ်ဖက် ပြတ်ထွက်သွားခဲ့တယ်လို့ သိရပါတယ်။
လုပ်ကိုင်စားသောက်ဖို့ လိုအပ်တာကြောင့် သက်ဆိုင်ရာတွေက စစ်ကျန်လက်နက်နဲ့ မြေမြှုပ်မိုင်းတွေ ရှင်းလင်းပေးကြဖို့ ရွာခံတွေက တောင်းဆိုနေကြပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ ၂၀၂၅ နိုဝင်ဘာ ၂၉ ရက်နဲ့ ၃၀ ရက်တွေမှာ တအာင်းတပ်မတော် TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
