အိုက်ပွီး၊ ဒီဇင်ဘာလ ၃၁ ရက်၊ တီးတိန်
ချင်းပြည်နယ်၊ တီးတိန်မြို့နယ်၊ ဆဲဇန်ကျေးရွာမှာ စစ်ကောင်စီတပ် ပစ်ခတ်တဲ့ လက်နက်ကြီးကျည်ကြောင့် ကလေးငယ်တစ်ဦး သေဆုံးပြီး တစ်ဦး ထိခိုက်ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
မနေ့ ဒီဇင်ဘာလ ၃၀ ရက် ညနေ ၅ နာရီဝန်းကျင်မှာ တီးတိန်အခြေစိုက် ခလရ ၂၆၉ တပ်ရင်းမှ ရမ်းသမ်းပစ်ခတ်တဲ့ လက်နက်ကြီးကျည်တစ်လုံးဟာ ဆဲဇန်ကျေးရွာမှာ ကျရောက်ပေါက်ကွဲလို့ ထိခိုက်သေဆုံးခဲ့တာဖြစ်ပါတယ်။
“ညနေဘက် မိသားစုတွေ ထမင်းစားကြတာ။ ကလေးက ပန်ကန်သွားဆေးတဲ့ခါ စကစ လက်နက်ကြီးကျည် ထိမှန်ပြီးတော့ ပွဲချင်းပြီး ဆုံးသွားတယ်။ နောက်ထပ် ကလေးတစ်ယောက်လည်း လက်မောင်းမှာ ထိမှန်ပြီး ဒဏ်ရာရတယ်။” လို့ တီးတိန်မြို့နယ် ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
သေဆုံးသူဟာ အသက် (၈) နှစ်အရွယ် Grade -1 ကျောင်းသားဖြစ်တဲ့ မောင် Pau Muan Sang ဖြစ်ပြီး ဒဏ်ရာရရှိသူဟာ အသက်(၁၄) နှစ်အရွယ်ဖြစ်ပါတယ်။
မနေ့ညနေပိုင်းက တီးတိန်အခြေစိုက် ခလရ ၂၆၉ တပ်ရင်းမှ စစ်ကောင်စီတပ်က အရပ်သားပြည်သူတွေနေထိုင်တဲ့ ကျေးရွာတွေကို လက်နက်ကြီးကျည်တွေ ရမ်းသန်းပစ်ခတ်ခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
တီးတိန်မြို့နယ်ရှိ တီးတိန်-ကလေး ကားလမ်းမပေါ်မှာလည်း စစ်ကောင်စီတပ်နဲ့ ပြည်သူ့ကာကွယ်ရေးတပ် (ဇိုလဲန်း) တို့ တိုက်ပွဲပြင်းထန်နေတယ်လို့ သိရပါတယ်။
ဒါကြောင့် တီးတိန်-ကလေး ကားလမ်းမကို ပြည်သူတွေအနေနဲ့ အသုံးမပြုဖို့ PDF-Zoland က မနေ့ ဒီဇင်ဘာလ ၃၀ ရက်နေ့က အသိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
