အလင်း ၊ ဇန်နဝါရီ ၁၇ ရက်၊ တမူး
စစ်ကိုင်းတိုင်း၊ တမူးမြို့နယ်မှာ အမည်မသိ လက်နက်ကိုင်အဖွဲ့အစည်းတစ်ခုမှ ဖမ်းဆီးခေါ်ဆောင်သွားတဲ့ လူငယ် ၁၂ ဦးဟာ တစ်စုံတစ်ရာ အဆက်သွယ်မရဘဲ ပျောက်ဆုံးနေတယ်လို့ မိသားစုဝင်တွေက ရွှေဖီမြေသို့ ပြောပါတယ်။
အဲဒီလူငယ်တွေဟာ တမူးမြို့နယ်၊ ကွမ်းတောင်ကျေးရွာက လူငယ်တွေဖြစ်ပြီး စိုက်ပျိုးရေးခြံမှာ အလုပ်လုပ်နေရင်း ပြီးခဲ့တဲ့ ဇန်နဝါရီလ ၁၁ ရက်နေ့မှာ အမည်မသိ လက်နက်ကိုင် အဖွဲ့အစည်းတစ်ခုရဲ့ ဖမ်းဆီးတာကို ခံရတာဖြစ်ပါတယ်။
“ရွာမှာက စစ်ကောင်စီ၊ ပျူစောထီးတွေ အရမ်းခြေရှုပ်တယ်။ ကလေးတွေ ပေါ်တာဆွဲခံရမှာလည်း စိုးရိမ်လို့ စိုက်ခြံမှာ အလုပ်လုပ်ရင်း ညအိပ်ထားခဲ့တာပါ။ စိုက်ခြံမှာပဲ လက်နက်ကိုင်အဖွဲ့အစည်းက ဖမ်းဆီးခေါ်ဆောင်သွားတာပါ” လို့ မိသားစုဝင်တစ်ဦးက ရွှေဖီမြေသို့ ပြောပါတယ်။
ဖမ်းဆီးတဲ့ အဖွဲ့အစည်းဟာ မည်သည့်အဖွဲ့အစည်းတွေဖြစ်ကြောင်း မသိရှိသလို အဖမ်းခံရတဲ့ လူငယ်တွေနဲ့လည်း ဒီကနေ့ထိ မည်သည့် အဆက်သွယ်မရဘဲ မိသားစုဝင်တွေက ၎င်းတို့ရဲ့အသက်အန္တရာယ်အတွက် စိုးရိမ်နေကြပါတယ်။
“ကလေးတွေက ဘယ်နေရာမှာ ဘယ်သူတွေက ဖမ်းသွားတာလဲဆိုတာ သိရရင် တော်သေးတယ်။ အခုက ဖမ်းခေါ်သွားကတည်းက ဘာမှအဆက်သွယ်မရတော့ ပိုစိတ်ပူတာပေါ့။ ကလေးတွေက အဆင်ကြရဲလားပေါ့။ သူတို့ကို ပြန်လွတ်ပေးစေချင်ပါတယ်။” လို့ မိသားစုဝင်တစ်ဦးက ရွှေဖီမြေသို့ ပြောပါတယ်။
တမူးမြို့နဲ့အနီးအနား ကျေးရွာတွေမှာ စစ်ကောင်စီတပ်နဲ့ ပျူစောထီးတွေက မကြာခဏ စစ်မှုထမ်းဖို့ လူငယ်တွေဖမ်းဆီးမှုတွေရှိတာကြောင့် လူငယ်တွေဟာ အခုလို တောတောင်တွေထဲမှာ ထွက်ပြေးတိမ်းရှောင်နေကြတာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
