ပျားကြီး၊ မတ်လ ၁၀ ရက်၊ မန္တလေး
ဧရာဝတီမြစ်တစ်ဖက်ကမ်း မင်းကွန်းဒေသက ကျေးရွာတချို့ကို တိုက်ပွဲ ဖြစ်ပွားမှု မရှိဘဲ စစ်ကောင်စီတပ်က မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။
မနေ့ မတ်လ ၉ ရက် ညနေ ၆ နာရီဝန်းကျင်ကစပြီး ဧရာဝတီမြစ် အနောက်ဖက်ကမ်းက ကျေးရွာတွေဘက်မှာ မီးအကြီးအကျယ် လောင်ကျွမ်းခဲ့ပြီး မီးလောင်မှုကြောင့် ထွက်ရှိလာတဲ့ မီးခိုးနဲ့ အနံ့အသက်တွေကို မန္တလေးမြို့ပေါ်က ဒေသခံတွေပါ မြင်တွေ့ခံစားခဲ့ရတာ ဖြစ်ပါတယ်။
“မန္တလေးမှာက စုံ မ ကိစ္စကို ဒုက္ခလို့ ထင်နေကြတယ်။ အနောက်ဖက်ကမ်းမှာ အခု မီးလောင်တိုက်သွင်းနေပြီ။ မြစ်လယ်က သူတို့(စစ်ကောင်စီ)ကို မထောက်ခံတဲ့ ကျွန်းတွေကို အဓိက ရှင်းလင်းတာ တိုက်ပွဲ မရှိဘူး။ စစ်ကြောင်းထိုး၊ သောက်စားမူးယစ်ပြီးမှ ရွာလုံးကျွတ် မီးရှို့တာ။ အခုထိ မီးက လောင်နေတုန်းပဲ” လို့ မန္တလေးမြို့ပေါ်မှာ နေထိုင်တဲ့ ဟင်းရွက်စုကျေးရွာမှ ဒေသခံတစ်ဦးက ပြောပါတယ်။
ကျေးရွာ မီးရှို့ခံရတာနဲ့ပတ်သက်ပြီး နောက်ဆက်တွဲ အခြေအနေကို ရွှေဖီမြေအနေနဲ့ ဆက်လက်စုံစမ်းနေပြီး မီးရှို့ခံရတဲ့ကျေးရွာနဲ့ ပျက်စီးဆုံးရှုံးမှု အခြေအနေကိုတော့ မသိရသေးပါဘူး။
ဧရာဝတီမြစ်အနောက်ဖက်ကမ်းက ကျေးရွာတွေအပြင် မြစ်လယ်က ဟင်းရွက်စုရွာကိုပါ မီးလောင်တိုက်သွင်းနေတာဖြစ်ပြီး မနေ့ည ၈ နာရီအထိ မီးလောင်မှုကို မန္တလေးမြို့ပေါ်ကနေ မြင်တွေ့နေရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
