အလင်း၊ ဇန်နဝါရီလ ၃၁ ရက်၊ ဖလမ်း
ချင်းပြည်နယ်၊ ဖလမ်းမြို့နယ်မှာ ချင်းတော်လှန်ရေးတပ်တွေနဲ့ စစ်ကောင်စီတပ်တို့ တိုက်ပွဲတွေ ပြင်းထန်နေပြီး စစ်ကောင်စီတပ်က လေကြောင်းကနေ ဗုံးကြဲ တိုက်ခိုက်မှုတွေ ဆက်တိုက် ပြုလုပ်နေတယ်လို့ ဒေသခံတွေက ရွှေဖီမြေသို့ ပြောပါတယ်။
ဖလမ်းမြို့အနီး ခွန်လီကျေးရွာမှာ မနေ့ ဇန်နဝါရီ ၃၀ ရက်နေ့က စစ်ကောင်စီ တပ်တွေ ခြေကုပ်နေရာယူထားတဲ့ စခန်းတွေကို ချင်းတော်လှန်ရေးတပ်ဖွဲ့တွေက တပြိုင်နက် ထိုးစစ်ဆင် တိုက်ခိုက်ခဲ့ပြီး တိုက်ပွဲတွေ ပြင်းထန်ခဲ့တယ်လို့ သိရပါတယ်။
“ခွန်လီရွာမှာ စစ်ကောင်စီတပ်တွေ ခြေကုပ်နေရာယူထားတယ်။ အဲရွာက စစ်ကောင်စီက ရှေ့ဆက်မတိုးတော့ဘဲ အခြေချတာပါ။ ဖလမ်းမြို့နဲ့လည်း သိပ်မဝေးဘူး။ မနေ့က ကျနော်တို့က တပြိုင်နက် တိုက်ခိုက်ခဲ့ပြီး တိုက်ပွဲပြင်းထန်ခဲ့ပါတယ်” လို့ ရှေ့တန်းစစ်ရေးသတင်းအရင်းမြစ်က ရွှေဖီမြေသို့ ပြောပါတယ်။
အဲဒီတိုက်ပွဲမှာ စစ်ကောင်စီတပ်ဘက်က ထိခိုက်သေဆုံးမှုများသလို ချင်းတော်လှန်ရေးတပ်ဖွဲ့ဘက်က CDF (ဟွာငိုရမ်) ရဲဘော်တစ်ဦး ကျဆုံးခဲ့ပြီး ရဲဘော်တချို့ ထိခိုက်ဒဏ်ရာရရှိခဲ့တယ်လို့ ရှေ့တန်းစစ်ရေးသတင်းရင်းမြစ်ဆီက သိရပါတယ်။
ဒါ့အပြင် ဖလမ်းမြို့အရှေ့ဘက်မှာလည်း တိုက်ပွဲဖြစ်ပွားတာ မရှိဘဲ ဆီမ်ဒီးကျေးရွာကို စစ်ကောင်စီက မနေ့ ဇန်နဝါရီလ ၃၀ ရက် ညနေ ၃ နာရီခန့်မှာ Y-12 လေယာဉ်နဲ့ ဗုံးသီး ၈ လုံး ကြဲချတိုက်ခိုက်ခဲ့ပြီး နေအိမ် ၃ လုံး မီးလောင်ပြာကျခဲ့ပါတယ်။
“ဖလမ်းမှာ စစ်ကြောင်းထိုး တိုက်ပွဲဖြစ်ကတည်းက ရွာသားတွေက ရွာမှာမနေတော့ဘဲ ကြိုတင်ထွက်ပြေးတိမ်းရှောင်ခဲ့လို့ အရပ်သားတွေ ထိခိုက်ဒဏ်ရာရရှိမှု မရှိခဲ့ဘူး။ နေအိမ် ၃ လုံး ပြာကျသွားတယ်။ တခြားအိမ်တွေလည်း အနည်းငယ် ပျက်စီးမှုရှိတယ်။” လို့ ဒေသခံတစ်ဦးက ရွှေဖီမြေသို့ ပြောပါတယ်။
ဇန်နဝါရီလ ၂၈ ရက်နေ့ကလည်း ဖလမ်းမြို့နယ် Sunthla ကျေးရွာကို စစ်ကောင်စီက လေကြောင်း ဗုံးကြဲတိုက်ခိုက်ခဲ့ပြီး နေအိမ် ၁ လုံး မီးလောင်ကာ ၅ လုံးထက်မနည်း ပျက်စီးခဲ့ပါတယ်။
ဒေသခံတွေဟာ လေကြောင်းရန်ကြောင့် ကြိုတင်တိမ်းရှောင်နေကြလို့ လူထိခိုက်ဒဏ်ရာရမှုတော့ မရှိဘူးလို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
