မိုင်းဖိူမ်းဆငဲ၊ ဇန်နဝါရီ ၁၄ ရက်
ကိုးကန့်တပ်မတော် – MNDAA နဲ့ ‘ဝ’တပ်မတော် – UWSA တို့ ထိန်းချုပ်ထားတဲ့ နယ်မြေတွေမှာ သူတို့ထုတ်ပေးတဲ့ ယာဥ်လိုင်စင်တွေ စစ်ဆေးတင်းကြပ်မှုတွေ စတင်ပြုလုပ်လာတယ်လို့ သိရပါတယ်။
ကိုးကန့်နဲ့ ‘ဝ’တို့ဟာ ဒီလ ဇန်နဝါရီ ဒုတိယအပတ်ကစပြီး ယာဥ်လိုင်စင်တွေ စစ်ဆေးတာဖြစ်ပြီး သူတို့ထုတ်ပေးတဲ့ ယာဥ်လိုင်စင်တစ်ခုမှမရှိရင် “ဝ” ပြည် နဲ့ ကိုးကန့်ဒေသကို ဆက်သွယ်ထားတဲ့ တံတားကို ဖြတ်သန်းသွားလာခွင့် မပြုဘူးလို့ ဆိုပါတယ်။
ဒေသခံအမျိုးသမီးတစ်ဦးက “အခုက ဘယ်လိုဖြစ်လာလဲဆိုရင် ကိုးကန့်ကော “ဝ” ဖက်မှာကော ယာဥ်လိုင်စင်တွေ အဓိကထားပြီး စစ်ဆေးလာတယ်ပေါ့။ ဟိုတစ်နေ့ကဆိုရင် ဖောင်ဆိပ်မှာ ကားတွေ ပိတ်တယ်လေ။ လိုင်စင်မရှိလို့ ပေးမဖြတ်တာ” လို့ ဆိုပါတယ်။
အဲဒီလိုင်စင် စစ်ဆေးမှုကြောင့် “ဝ” နဲ့ ကိုးကန့်တို့ ထုတ်ပေးတဲ့ ယာဉ်လိုင်စင်မရှိတဲ့ ကားသမားတွေအတွက် အခက်အခဲတချို့ ကြုံတွေ့နေရတယ်လို့ ဆိုပါတယ်။
UWSA ဟာ မိုင်းပေါက်၊ ပန်ဆန်းစတဲ့ သူတို့ ထိန်းချုပ်နယ်မြေတွေမှာလည်း သူတို့ ထုတ်ပေးတဲ့ ယာဥ်လိုင်စင်တွေ စစ်ဆေးတင်းကြပ်တာရှိသလို မြန်မာနိုင်ငံထုတ် ယာဥ်လိုင်စင်ရှိ ကားတွေကို ဖြတ်သန်းသွားလာခွင့် ပြုတာတွေတော့ရှိတယ်လို့ သိရပါတယ်။
ကိုးကန့်ထိန်းချုပ်ဒေသမှာတော့ “ဝ”က ထုတ်ပေးတဲ့ ယာဥ်လိုင်စင်ရှိတဲ့ ကားတွေကို သွားလာခွင့်ပြုတာရှိပေမဲ့ မြန်မာနိုင်ငံထုတ်ပေးတဲ့ ယာဉ်လိုင်စင်တွေကိုတော့ တရားမဝင်ဘူးဆိုတာကြောင့် အသိအမှတ်မပြုဘူးလို့ ဒေသခံသတင်းရင်းမြစ်တွေဆီကနေ သိရပါတယ်။
ကိုးကန့်တပ်က ထုတ်ပေးတဲ့ ယာဥ်လိုင်စင်ပြုလုပ်ဖို့ သူတို့ ထုတ်ပေးတဲ့ အိမ်ထောင်စုစာရင်းလိုအပ်သလို ဒေသထဲ ပြောင်းရွှေ့အလုပ်သမားတွေက လုပ်ငန်းရှင်ရဲ့ ထောက်ခံချက်လည်း လိုအပ်တယ်လို့ ဆိုကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
