ရွှေဖီမြေ၊ ဖေဖော်ဝါရီ ၉ ရက်
စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီလကနေ ၂၀၂၄ ခုနှစ်အထိ ရှမ်းမြောက်မှာ တိုက်ပွဲပဋိပက္ခတွေကြောင့် အရပ်သား ၈၉၄ ဦး ထိခိုက်နစ်နာခဲ့ရပြီး နစ်နာသူတွေကို လူသားချင်းစာနာမှုအကူအညီတွေ ပေးနိုင်ဖို့ နိုင်ငံတကာအနေနဲ့ ဝိုင်းဝန်းကူညီဖို့ တအာင်းအမျိုးသမီးအဖွဲ့အစည်း TWO က တောင်းဆိုလိုက်ပါတယ်။
ဖေဖော်ဝါရီ ၇ ရက်မှာ ပြုလုပ်တဲ့ “လုံခြုံမှုကင်းမဲ့သောဘဝများ” အစီအရင်ခံစာ သတင်းစာရှင်းလင်းပွဲမှာ TWO က အခုလို တောင်းဆိုလိုက်တာ ဖြစ်ပါတယ်။
အဆိုပါ ထိခိုက်နစ်နာသူ ၈၉၄ ဦးထဲမှာ လေကြောင်းတိုက်ခိုက်မှုကြောင့် ၂၇၅ ဦး၊ လက်နက်ကြီး ပစ်ခတ်မှုကြောင့် ၂၆၄ ဦး၊ မြေမြှပ်မိုင်းကြောင့် ၁၄၄ ဦး၊ စစ်လက်နက်အကြွင်းအကျန်ကြောင့် ၂၃ ဦး၊ မတရားဖမ်းဆီးချုပ်နှောင်ခြင်းကြောင့် ၁၀၀ ဦး၊ သတ်ဖြတ်ခံရသူ ၂၈ ဦး၊ သေနတ်နဲ့ ပစ်ခတ်ခံရသူ ၂၅ ဦး၊ ညှင်းပန်းနှိပ်စက်ခံရသူ ၁၄ ဦး၊ အဓမ္မပြုကျင့်ခံရသူ ၄ ဦးနဲ့ ပေါ်တာဆွဲခံရသူ ၁၇ ဦး ပါဝင်တယ်လို့ သိရပါတယ်။
ဒီဖြစ်စဥ်တွေဟာ ရှမ်းမြောက်က မူဆယ်၊ နမ့်ခမ်း၊ ကွတ်ခိုင်၊ သိန္နီ၊ လားရှိုး၊ ကျောက်မဲ၊ သီပေါ၊ နမ္မတူ၊ နမ့်ဆန်၊ မန်တုံ၊ မိုင်းလုံ၊ မိုင်းငေါ့၊ မိုးမိတ်၊ ရှမ်းတောင်က ရပ်စောက်၊ ကျောက်ဂူနဲ့ မန္တလေးတိုင်း မိုးကုတ်မြို့နယ်တွေမှာ ဖြစ်ပွားခဲ့တဲ့ ဖြစ်စဥ်တွေဖြစ်တယ်လို့ ဆိုပါတယ်။
ဒီအချက်အလက်တွေဟာ TWO က လက်လှမ်းမှီသလောက် ကောက်ယူရရှိထားတဲ့ အချက်အလက်တွေသာဖြစ်ပြီး မြေပြင်မှာ ဒီထက်ပိုများနိုင်တယ်လို့လည်း ပြောပါတယ်။
ထိခိုက်နစ်နာသူတွေဟာ လုံလောက်တဲ့ အကူအညီမရရှိဘဲ ထိခိုက်နစ်နာသူတွေကို အချိန်နဲ့ တပြေးညီ ထိရောက်တဲ့ လူသားချင်း စာနာထောက်ထားမှု အကူအညီတွေပေးနိုင်ဖို့ နိုင်ငံတကာရဲ့ ကူညီထောက်ပံ့မှုတွေ လိုအပ်နေတာကြောင့် နိုင်ငံတကာက ဝိုင်းဝန်းကူညီပေးဖို့ TWO က တောင်းဆိုထားတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
