တစ်ဟုန်ထိုး မြှင့်တက်လာတဲ့ ကုန်ဈေးနှုန်းနဲ့ အလုပ်အကိုင် ရှားပါးမှုတွေကြောင့် တအာင်းတပ်မတော် ထိန်းချုပ်ထားတဲ့ ရှမ်းမြောက် သီပေါမြို့မှာ စစ်လက်နက်အကြွင်းအကျန် ရှာဖွေပြီး ရောင်းချမှုက ဈေးကွက်တစ်ခု ဖြစ်နေပါတယ်။
လက်ရှိ သီပေါမြို့မှာ ကျဉ်ဆံခွံ တစ်ပိဿာကို ၁ သောင်းကျပ် ရကြပါတယ်။
အဲဒီလို စစ်လက်နက် အကြွင်းအကျန် ရှာဖွေရင်း ဒေသခံတွေဟာ စစ်ကောင်စီတပ် ထောင်ထားတဲ့ မြေမြှုပ်မိုင်း နင်းမိပြီး သေဆုံးတာနဲ့ ဒဏ်ရာရတာတွေ မကြာခဏ ဖြစ်ပွားနေပါတယ်။
တအာင်းတပ်ရဲ့ တာဝန်ရှိသူတွေကတော့ တပ်စခန်းတွေထဲ ဒေသခံတွေ မဝင်ဖို့ တားမြစ်ထားတယ်လို့ ရွှေဖီမြေကို ပြောပါတယ်။ ဒါပေမဲ့ ဒေသခံတချို့ဟာ တပ်စခန်းထဲ ခိုးဝင်နေတာကြောင့် ထိခိုက်သေဆုံးမှု ရှိနေပါတယ်။
သီပေါမြို့မှာ စစ်လက်နက် အကြွင်းအကျန် ရှာရင်း မြေမြှုပ်မိုင်း နင်းမိပြီး ထိခိုက်ဒဏ်ရာရခဲ့တဲ့ မိသားစုဝင်ကို ရွှေဖီမြေက တွေ့ဆုံမေးမြန်းထားပါတယ်။
