Mandalay

ငလျင် လှုပ်ခတ်မှုကြောင့် မန္တလေးတိုင်း ချမ်းမြသာစည်မြို့နယ် ၁၅-၁၆ လမ်းကြား နှင်းဆီခြံ ဗလီဝင်းထဲက ၇ လွှာတိုက် ပြိုကျခဲ့ပြီး လက်ရှိအချိန်ထိ အယောက် ၄၀ ပိတ်မိနေဆဲဖြစ်ကြောင်း ဒေသခံတွေက ရွှေဖီမြေကို ပြောပါတယ်။

ငလျင်ဒဏ်ကြောင့် ထိခိုက်သေဆုံးမှု များတဲ့ မန္တလေးတိုင်းမှာ ဒီနေ့ မတ်လ ၃၀ ရက် နေ့လယ် ၁ နာရီ ၃၈ မိနစ်မှာ ငလျင် လှုပ်ခတ်မှု ထပ်မံ ဖြစ်ပွားခဲ့တယ်လို့ ဒေသခံတွေက ပြောပါတယ်။

အင်အားပြင်းငလျင် လှုပ်ခတ်ခဲ့တာကြောင့် မန္တလေးတိုင်း ပြည်ကြီးတံခွန်မြို့နယ် ၅၂ လမ်း‌၊ ၁၂၈ လမ်းအနီး ပြိုကျပျက်စီးခဲ့တဲ့ နေအိမ်တွေထဲက နေအိမ်တစ်ခုမှာ မိသားစု ၇ ဦး သေဆုံးခဲ့ပေမဲ့ ကယ်ဆယ်ရေး မလုပ်ပေးနိုင်သေးတာကြောင့် ဒီနေ့မနက်အထိ အပုတ်နံ့ ထွက်နေတယ်လို့ ရပ်ကွက်နေအမျိုးသမီးက ရွှေဖီမြေကို ပြောပါတယ်။

မန္တလေးမြို့တစ်ခုလုံး ငလျင်ဒဏ် ခံနေရချိန် မဟာအောင်မြေမြို့နယ်ထဲမှာ စစ်ကောင်စီက စစ်မှုထမ်းဖို့ မဲပေါက်ထားတဲ့ လူငယ်တွေကို လိုက်လံ ခေါ်ယူနေတယ်လို့ ဒေသခံတွေက ရွှေဖီမြေကို ပြောပါတယ်။

မန္တလေးတိုင်း အောင်မြေသာစံမြို့နယ်ရှိ Sky Villa အဆောက်အဦးမှာ ငလျင်လှုပ်ခတ်မှုကြောင့် ပိတ်မိနေသူ ၄၃ ဦးကို အသက်ရှင်လျက် ကယ်ထုတ်နိုင်ခဲ့ပြီး သေဆုံးသူ ၉ ဦးရဲ့အလောင်း တွေ့ရှိထားတယ်လို့ မြန်မာနိုင်ငံ မီးသတ်ဦးစီးဌာနက ထုတ်ပြန်ထားပါတယ်။

မန္တလေးမြို့ရှိ ဥလှသိန်းဗိမ္မာန်မှာ ငလျင် လှုပ်ခတ်မှုကြောင့် ဓမ္မစရိယစာမေးပွဲ ဖြေဆိုနေတဲ့ သံဃာတော် အပါး ၈၀ ထက်မနည်း ပျံလွန်တော်မူသွားတယ်လို့ ရွှေဖီမြေက စုံစမ်းသိရှိရပါတယ်။

အင်အားပြင်းတဲ့ ငလျင်ဒဏ်ကြောင့် မန္တလေးမြို့မှာ သေဆုံးသူ ၈၀၀ ကျော်အထိရှိလာပြီး အေးရိပ်ငြိမ်သုဿန်မှာ အလောင်း စုပုံနေတယ်လို့ ဒေသခံ ပရဟိတသမားတွေက ရွှေဖီမြေကို ပြောပါတယ်။

မန္တလေးမြို့ပေါ်ရှိ ရပ်ကွက်အများစုမှာ ဒီနေ့မနက်ပိုင်းကစပြီး စစ်မှုထမ်းသင်တန်း အပတ်စဉ် ၁၂ တက်ရောက်ဖို့အတွက် အတင်းအကြပ် မဲနှိုက်ခိုင်းတာတွေ ပြုလုပ်ခဲ့ကြတယ်လို့ ဒေသခံတွေက ပြောပါတယ်။

မန္တလေးမြို့ပေါ်မှာ ထောက်ပံ့ကြေးပေးမယ်ဆိုတဲ့ မက်လုံးနဲ့ အနယ်နယ်အရပ်ရပ်က ရောက်ရှိနေတဲ့ စစ်ဘေးရှောင် လူဦးရေစာရင်းကို စစ်ကောင်စီက ကောက်ယူနေတယ်လို့ ဒေသခံတွေက ပြောပါတယ်။

မန္တလေးမြို့ပေါ်မှာ အခြေခံပညာအဆင့်ကျောင်းသားတွေကို စစ်မှုထမ်းဖို့ ဖမ်းဆီးခေါ်ယူမှု ပြုလုပ်နေတာကြောင့် သက်ဆိုင်ရာ ကျောင်းတွေကနေ ကျောင်းတက်နေဆဲဖြစ်ကြောင်း ထောက်ခံစာ တောင်းယူနေရတယ်လို့ ဒေသခံတွေက ပြောပါတယ်။