Mandalay

မန္တလေးမြို့မှာ ဖြစ်ပွားခဲ့တဲ့ ငလျင် လှုပ်ခတ်မှုကြောင့် စစ်ကောင်စီရဲ့ ခွင့်ပြုချက်နဲ့ ပေါ်တင် ဖွင့်လှစ်လုပ်ကိုင်နေတဲ့ ဂျင်ဝိုင်းအဆောက်အဦး ပြုကျပျက်စီးမှုမှာ သေဆုံးသူ ရာနဲ့ချီပြီး ရှိနေတယ်လို့ ဒေသခံတွေက ပြောပါတယ်။

မန္တလေး ငလျင်မှာ စစ်ကိုင်းတိုင်း တမူးမြို့နယ်က စစ်ဘေးရှောင် ၁၀ ဦးထက်မနည်း သေဆုံးပြီး အများစု အဆက်သွယ် မရဘဲ ပျောက်ဆုံးနေတယ်လို့ မိသားစုဝင်တွေဆီက သိရပါတယ်။

ငလျင်ဒဏ်ကို အပြင်းအထန် ခံစားနေရတဲ့ မန္တလေးတိုင်းနဲ့ စစ်ကိုင်းတိုင်းက နေရာတချို့မှာ အရေးပေါ် လိုအပ်နေတဲ့ သောက်ရေသန့်ကို လိုအပ်သလောက်ဝယ်ယူလို့ မရတော့တဲ့အပြင် လီတာဝက် တစ်ဘူးကို ၂ ထောင်နဲ့ ပေးဝယ်နေရကြောင်း ပြည်ကြီးတံခွန်မြို့နေ အမျိုးသမီးရဲ့ ပြောပြချက်အရ သိရပါတယ်။

မန္တလေးတိုင်း အောင်မြေသာစံမြို့နယ်ရှိ Sky Villa ကွန်ဒို ပြိုကျမှုမှာ ပိတ်မိနေတဲ့ ရှမ်းမြောက် ကွတ်ခိုင်မြို့နယ် နမ့်ဖတ်ကာကျေးရွာက တအာင်းလူမျိုးဖြစ်တဲ့ လွေးခင်လှိုင်ကို ၃ ရက်အကြာမှာ အသက်ရှင်လျက် ကယ်ထုတ်နိုင်ခဲ့တယ်လို့ သိရပါတယ်။

ငလျင်ဒဏ်ကို အလူးအလဲ ခံစားနေရတဲ့ မန္တလေးမြို့မှာ စစ်ကောင်စီက သင်္ကြန်မှာ ပျော်ပါးဖို့အတွက် မဏ္ဍပ်တွေကို အင်တိုက်အားတိုက်နဲ့ ဆောက်လုပ်နေဆဲဖြစ်တယ်လို့ ဒေသခံတွေက ပြောပါတယ်။

ငလျင်ကြောင့် ပြိုကျခဲ့တဲ့ မန္တလေးမြို့က ဦးလှသိန်း ဗိမ္မာန်အတွင်းမှာ ပျောက်ဆုံးနေတဲ့ သံဃာတော်တွေကို ဆက်လက် ရှာဖွေနေပြီး ပျက်စီးနေတဲ့ အဆောက်အဦးကြားမှာလည်း အပုတ်နံ့ ထွက်နေတယ်လို့ ငလျင်လှုပ်ခတ်စဥ် ဦးလှသိန်း ဗိမ္မာန်ကနေ လွတ်မြောက်လာတဲ့ ဦးဇင်းတစ်ပါးက မိန့်ပါတယ်။

ငလျင် လှုပ်ခတ်မှုကြောင့် မန္တလေးတိုင်း ချမ်းမြသာစည်မြို့နယ် ၁၅-၁၆ လမ်းကြား နှင်းဆီခြံ ဗလီဝင်းထဲက ၇ လွှာတိုက် ပြိုကျခဲ့ပြီး လက်ရှိအချိန်ထိ အယောက် ၄၀ ပိတ်မိနေဆဲဖြစ်ကြောင်း ဒေသခံတွေက ရွှေဖီမြေကို ပြောပါတယ်။

ငလျင်ဒဏ်ကြောင့် ထိခိုက်သေဆုံးမှု များတဲ့ မန္တလေးတိုင်းမှာ ဒီနေ့ မတ်လ ၃၀ ရက် နေ့လယ် ၁ နာရီ ၃၈ မိနစ်မှာ ငလျင် လှုပ်ခတ်မှု ထပ်မံ ဖြစ်ပွားခဲ့တယ်လို့ ဒေသခံတွေက ပြောပါတယ်။

အင်အားပြင်းငလျင် လှုပ်ခတ်ခဲ့တာကြောင့် မန္တလေးတိုင်း ပြည်ကြီးတံခွန်မြို့နယ် ၅၂ လမ်း‌၊ ၁၂၈ လမ်းအနီး ပြိုကျပျက်စီးခဲ့တဲ့ နေအိမ်တွေထဲက နေအိမ်တစ်ခုမှာ မိသားစု ၇ ဦး သေဆုံးခဲ့ပေမဲ့ ကယ်ဆယ်ရေး မလုပ်ပေးနိုင်သေးတာကြောင့် ဒီနေ့မနက်အထိ အပုတ်နံ့ ထွက်နေတယ်လို့ ရပ်ကွက်နေအမျိုးသမီးက ရွှေဖီမြေကို ပြောပါတယ်။

မန္တလေးမြို့တစ်ခုလုံး ငလျင်ဒဏ် ခံနေရချိန် မဟာအောင်မြေမြို့နယ်ထဲမှာ စစ်ကောင်စီက စစ်မှုထမ်းဖို့ မဲပေါက်ထားတဲ့ လူငယ်တွေကို လိုက်လံ ခေါ်ယူနေတယ်လို့ ဒေသခံတွေက ရွှေဖီမြေကို ပြောပါတယ်။