လိုည်းထိုည်း၊ ကျံရ်မေ ဆငည်း 29၊ မိုဂူႈ
ကောန်အီပ်ုန် ကဝ်အိီကတူႈငျားဒီန် က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ဆီုတအာင်း TNLA ကဲတထိင်ခြဲ ကပီုန်ဒါင်း မန္တလေး ပကီုင်းမိုဂူႈ ခေဲင်ဇံင်အူဇံင်ဒီန် ကဝ်အီမိုႈပိူဝ်အ်ုန် လီလာနဘာည်းဟာဝ်း တလှာန်အ်ုန်အောႏ။
ဘည်မိုႈဘည်ဘာည်း ဘည်ပဲန်ဟာဝ်းအ်ုန်မိုႈ ခည်ကျံရ်မေ ဆငည်း 26 ခီမှိူဝ် ကပံတ် 10 နြီဒိူန် ကဝ်အီမိုႈပိူဝ်အ်ုန်ဒီန် လီပ်ဒေဲႈဖါ်ႈခေဲင်ႎှါင်းအီတ်လှာန်အ်ုန် စီဒါမှောန်တက်ုတ်ဖါ်ႈ စီလီလာနဘာည်းဟာဝ်းတအ်ုန် ဆဲႈဒီန် ကပျောဒါႈဘိုးမည်က်ုန်ႎီရ်က္လာင်းတအီး အောနံင်ပျံမ်းဟာဝ်းမည်အောႏ။
ကောန်အီပ်ုန်ဒီန်က္လာင်းဒါႈ “ ဂါင်ယဲပိူဝ်အော အ်ုန်ကဒပ်။ ဆငည်းဒီန် အ်ုန်ဒါႈ ကောန်အ်ုန်အာဝ်ဂေါည်တခိူည် ဂါရ်ကောန်အ်ုန်စီ ဒေဲႈအီတ် ရီမ်းပြောဒီအီတ်အော။ ခိင်အီတ်ဘီးအော အ်ုန်စီလီပ်ဒေဲႈလာ်ခေဲင်ဒီအီတ်အော။ ဟောည်ႇဒီန် အ်ုန်ရီန်ဒေပူည်ႇဂြူအော ခိင်ဒီန်အောစီကစာႈလာ် စီရိုင်ဒီႈ အ်ုန်ဒါႈမည်ရိုင် စီဒါလာ်မှောန်တက်ုတ်ဟာဝ်ငါည်အော။ ကဇေန်နီး အ်ုန်ဂီုည်ဒဝ်လောတ်”။
ကဝ်အီလူည်ႇအမှုကာမဒီန် အ်ုန်ဇီုဝ် ဦးကျော်မိုး ဘိူန်းအဆာက် ကပံတ် 40 ဆန်ုမ် ကောန်အီပ်ုန် ကဝ်အီကတူႈအီနဘာည်းဒီန် ဘိူန်းအဆာက် 17 ဆန်ုမ် ဇီုဝ်မပျော်(ဇီုဝ်ႎဲႈ)အောႏ။
ကောန်အီပ်ုန်ဒီန် ဆီုပ်ဒါႈဘိုး ဆဲႈဒီန် ခည်ဆန်ုမ် 2020 ဒိူန်မာ် ပိူဝ်အ်ုန်ဒီန် တိူမ်ရီန်အူန်ဒေလီလာနဘာည်းဟာဝ်းတအ်ုန် ခိင်ဒီန်အ်ုန်စီပ္လိုရ်ႈတောႇအီကဇောည် အ်ုန်စီလောတ်ဟာဝ်း။
ရမာကောန်အီပ်ုန်ဒီန် က္လာင်းဒါႈ ကဲဟည်ဟြာင်းက္လာင်းအူန်း တဌာနကဲအီကဆီုဝ်ကဆဲင်တောပ်တအမှု ဘည်မိုႈဘည်ဘာည်းဒီန် ဆဲႈဒီန်ကဲဟည်စေတ်မေန်းဟာဝ်းဘိုးအမှုဒီန်အောႏ။
ဘာည်းလိူည်ဒီန် ခည်ကျံရ်အေပ်ြုရ် ဆငည်း 18 ဒိူန်မာ် ပအရာပ်တအာင်း ခေဲင်လှံင်အိုမ်ယ်ုရ်နီန် ကတူႈႎည်းအ်ုန်၊လှာန်မာကောန်ဒဲႇဒီန် လီလာနဘာည်းဟာဝ်တ ကောန်ဒဲႇအဆာက် 5 ဆန်ုမ်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
