လိုည်းလာဝ်ဇာရ်၊ ကျံရ်အံက်တိုဘာ ဆငည်း 14၊ အိုမ်ယ်ုရ်
ဘည်ဒါကဲတယာန်ပ်ုရ် ပျောႈဟာဝ်းပ္လေဘျုင် ခေဲင်ရဝ်အိုမ်မစော်န် လှံင်အိုမ်ယ်ုရ် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း TNLA ကဲနီန် ခေဲင်ဂါရ်အီဘိူန်းဟာဝ်းဒီဆဲဝ်နီန် ဟည်ယံမ်းဟာဝ်း ပည် 2အီးယာ့်အောႏ။
ဘံန်ဟောည်ႇဟာဝ်း လိုည်းတီန်းတီန်းနော်ည် ဘိူန်းအဆာက် 17 ဂေါႇပ္လေဘျုင်ပ်ုန်ပျောႈဟာဝ်းကဲ အဒိူဝ် ကျံရ်အံက်တိုဘာ ဆငည်း 14 ခိင်ညှာ ကပံတ် 7နြီဒိူန် မမေတီန်းနော်ည် ကဝ်အီမိုႈႎါးနီန်မာ် ယံမ်းဟာဝ်းဘိုးအောႏ။
ကောန်အီပ်ုန်ကဝ်အီနံပ် ဘည်မိုႈဘည်ဘာည်းနီန်အူအီး က္လာင်းဒါႈ “ကဇေန်နီး ကဝ်အီမိုႈႎါးမာ် ဟည်ယံမ်းဟာဝ်း။ ဂါရ်ႎါႎည် အီဘိူန်းဟာဝ်း ဖေးဘာတ်ဆဲဝ်ဒိူန် ဟည်ယံမ်းဟာဝ်း ပည်အာရ်အီးယာ့်”
ဂေါႇဘျုင်ပ်ုန်ပျောႈဟာဝ်းကဲ ဘိူည်တိုန်းဟာဝ်း မမေတီန်းနော်ည် ဘိူန်းအဆာက် 15ဆန်ုမ် ကဝ်အီမိုႈႎါးနီန် ကနာည်နံင်ဟာဝ်းဆနံမ်း ပယုင်ဆနံမ်းဒါင်းမာ် အ်ုန်ဟည်ယံမ်းဟာဝ်းပဲတ် ကဒည်ဒေင်အောႏ။
ဂေါႇပ္လေဘျုင်ဒီန် မာည်းကောင်ချစ်ဖြိုး ဘိူန်းအဆာက် 10ဆန်ုမ်ကာည်း ယာနဴင်လီန်း ဘိူန်းအဆာက် 35ဆန်ုမ်နီန်မာ် ဆဲႈဒါဘိူန်းဂါရ်တဒီဆဲဝ် ဂါင်ဂေါည်မာ် ဟည်လူလေဲဝ်ဟာဝ်း 8ကြောင်အောႏ။
ခည်ကျံရ်အံက်တိုဘာ ဆငည်း 13ဒိူန်မာ် ဂေါႇမိုႈတံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေဘျုင် ပရဝ်ကယားဒါင်း လှံင်အိုမ်ယ်ုရ် စီပဲန်လလူလေဲဝ်ဟာဝ်းဖါ်ႈ ကျောင်ပနောဘေဲႇကာည်း ဂါင်ဂေါည် ဆဲႈဒီန် တိုအီးဘာတ်ဘိုး 2အီးအောႏ။
တံပ်ကညာအာဏာဆီုက်ဇေဝ်ကဲနီန် ပျောႈကစံပ်ဖါ်ႈပ္လေဘျုင် ပရဝ်၊ကီုင်း ခေဲင်အရာပ်ပ်ုန်ထိင်ခြဲအူန်း တံပ်ဆီုက်တအာင်းကဲ ဇူႈပွံတ် ခည်ကျံရ်အံက်တိုဘာ ဆငည်း 2 ရောတ်ဘံင် ဆငည်း 14 ခေဲင်ဘြည် 9ဆငည်းနီန် တောပ်ပည်ကောန်ကညောမ် 5အီး 33အီးယံမ်းဖါ်ႈ တောပ်ပည်ကောန်ကညောမ် 10အီး အီဘာတ်ဟည်မိုႈပွံတ် 31အီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
