မာည်းအဆျှဴင်၊ ကျံရ်မေ ဆငည်း 18
နံင်ရေဲန်ဟာဝ်းဖါ်ႈ ဇီုင်းကာန်လံပ်စေတ်မေန်တိုအီး ခေဲင်လှံင်ပ်ုန်ထိင်ခြဲအူန်း တံပ်ဆီုက်တအာင်းကဲနီန် တီုင်စေတ်မေန်တိုအီး – IDTL ကုင်တအာင်းကဲမာ် နံင်ရေဲန်ဟာဝ်း ကနာည်နှာင်းဘယ်ဒေ ထုက်ဒဲႈကဘ္လျကနံဝ်းတို ဆာ်အာဝ်မိုႈ ကဘ္လျအခွါင်းဘိူန်းဂေါည် ကနာည်တိုအီးခေဲင်အရာပ်ကဲအောႏ။
ကဝ်အီရံပ်ဇီုင်းကပ္လိူင် ခေဲင်တီုင်စေတ်မေန်တိုအီး ကုင်တအာင်းနီန်အူအီး က္လာင်းဒါႈ နံင်ရေဲန်ဟာဝ်း ဘည်ထုက်ဒဲႈကဘ္လျကနံဝ်းတို၊ ထုက်ဒဲႈ စြာင်းထာန်ဂေါည်တိုအီး ခေဲင်ရဟောမ်ရမာကာည်း ဘည်စေတ်မေန်တိုအီးခေဲင်အရာပ် ကနာည်ကူန်ရဝ်မာဂါင် ကဲအီခေဲင်အရာပ်တအာင်းနီန်အောႏ။
“ဆာ်မိုႈဇီုင်းကာန်လှေနီန် နံင်ကကာႈဖါ်ႈ ကောန်ကပီုန်ကဲ စေတ်မေန်ဟာဝ်းဒီးကော်။ နံင်စေတ်မေန် ဘည်ဟာဝ်းႎီရ် ကောန်အရာပ်အီဟံရ် ကဲအီဂေါည်ပကအူရ် အိုမ်ဘြည်ကတာည်း၊ ကဲအီဒေဲႈဂေါည် အာဝ်လီပ်တြားကဲဒိူန်ယာ့်။ အူလှေစီမိုႈ ကဘ္လျကနံဝ်းတိုဒီး။ နံင်ဘိူန်းဒါႈမိုႈ ကဘ္လျကနံဝ်းတို ခါမ်ဘည်မိုႈကောန်ကပီုန်နီန်”
ဂေါႇမိုႈ လံပ်စေတ်မေန်တိုအီးနီန် အရေးဒါင်းကနာည် လံပ်ဘ္လီုက်လှူပ်တြားဉပဒေ၊ အခွါင်းအရေး လံပ်ဘြောင်ရိူန်းခြီရ်၊ လံပ်ပိင်ငျာ၊ လံပ်ကတာရ်ႈဒါင်းဇာရ် တီုင်ခေါခါႇ၊ ကနာည်နံင်ကဇောည်ဒဲႈ ပ်ုန်ဟောမ်ပ်ုန်ဒါကဲနီန် ခေဲင်အရာပ် စီပဲန်အာဝ်လှေင်ဒါင်း ဟည်မိုႈနံင်ဇူႈရေဲန်ဟာဝ်း ဇီုင်းကာန်နီန်ယာ့်အောႏ။
ကဆီုဝ်တီုင်စေတ်မေန်တိုအီး ကုင်တအာင်းကဲနီန် ကဲဟည်တောႇဒဲႈဖါ်ႈ ႎါင်ပနောဇီုင်းကာန် တကဲအီနံင်ရံပ်ဇီုင်းကပ္လိူင်ကမာည်းကဲနီန်၊ ခည်ကျံရ်မေ ဆငည်း 16ဒိူန် ကဲဟည်ဟောည်ႇ ပ္လိူတ်ဟာဝ်းႎါင်ပနောကဲ၊ ဘည်ဘယ်ကဲတ ဒဲႈႎါင်ပနော တကဲအီရံပ်ဇီုင်းကပ္လိူင်ကမာည်းကဲနီန် 51အီး ကဲနံင်တောႇထဲင်ဘိုး အီရံပ်ဇီုင်းကပ္လိူင် ကမာည်းအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
