ယာရူစိင်၊ ကျံရ်အောဂ်ုတ် ဆငည်း 10၊ ဆဘော
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဘိုးပ္လေ ပကီုင်းဆဘော အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲအောႏ။
ခည်ကျံရ်အောဂ်ုတ် ဆငည်း 9 စူန်မှိူဝ် 4နြီဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ဒေဲႈပျောႈပ္လေ ပကီုင်းဆဘော ဇံင်ပန်းတိမ်တောင် ရီမ်းကျောင်ရေဟော်နီန်အောႏ။
ကောန်အီမာည်း ကဝ်အီဂေါည်ပကီုင်းဆဘောနီန်အူအီး က္လာင်းဒါႈ “ကဲဒေဲႈပျောႈဟာဝ်း ခေဲင်ႎါင်းဗိုလ်တဲ ရီမ်းကျောင်ရေဟော်နီန်။ ကဲဒေဲႈပျောႈ အာဝ်ယောမ် 2ပိုင်း။ ကဲဒေဲႈပျောႈဟာဝ်းလိူည် အူဒီ။ ဆာ်မိုႈဘည်တိူမ်လကဲနီန် ညှံမ်နံပ်စိ”
တောပ်အီကဆီုဝ်ကဆဲင် ဘည်ပျောႈဟာဝ်းကဲတပ္လေနီန် ဖုင်ယဲဆျှိုည်ဖီမျေ ဆီုင်ဒါ့်ဆီုပ်တခေါရ်အူန်းအောႏ။
ခည်ကျံရ်အောဂ်ုတ် ဆငည်း 8ဒိူန်မာ် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဟာဝ်းပ္လေ ပကီုင်းမာဝ်းႎံင်း အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်းကဲအောႏ။
ခည်ကျံရ်အောဂ်ုတ် ဆငည်း 3ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်း ပေါင် 500 ခေဲင်တံပ် တီုင်တံပ်ဇိူင်ချာ်န်း (ခလရ – 23) အ်ုန်အီမိုႈတံပ်ပြီမ် တံပ်ကညာအာဏာဆီုက်ဇေဝ်ကဲ အီဂေါည်ခေဲင်ကီုင်းဆဘောနီန် 4ပိုင်းအောႏ။
ဇူႈပွံတ်ကျံရ်ဇူန်လည် ရောတ်ဘံင်ကျံရ်အောဂ်ုတ် ခေဲင်ဘြည်အူကျံရ်လေႈနီန် ဂေါႇမိုႈတံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေဘျုင် ခေဲင်ကီုင်းဆဘော အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်းကဲနီန် 7လိူဝ်ႈ စီပဲန်တိုအီးရဝ် ဟည်ယံမ်းဖါ်ႈ 2အီး ဘာတ် 5အီးအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
