မာည်းရူပ၊ ကျံရ်အောဂ်ုတ် ဆငည်း 6
ကဲအီဂေါည်ခေဲင်ပ္လေါည်ကတီုက်ကပဴင်ကဲ က္လာင်းဒါႈ ဆီုက်ငါးတံပ်ကညာအာဏာဆီုက်ဇေဝ်ကဲ ဇူႈဒေဒါ ကဒါႇနောင်ခေဝ် ထိုးလီပ်ဟာဝ်း ကဒါႇမိုဂူႈပအရာပ်ထိင်ခြဲ တံပ်ဆီုက်တအာင်း TNLA ကဲနီန် ဟည်ရောတ်စာမ်း ပရဝ်ဟိုခိုအောႏ။
ကဲဒါႇတံပ်ကညာအာဏာဆီုက်ဇေဝ်ကဲ ဟည်ဘယ်ဒေလီပ်ဟာဝ်း ခေဲင်ရဝ်ဟိုခို လှံင်နောင်ခေဝ်နီန် အမှိူဝ် ကျံရ်အောဂ်ုတ် ဆငည်း 5 စူန်အံပ် ကပံတ် 5 နြီဒိူန် ဟည်ဘယ်ဘိုးဒေထိင်ခြဲဟာဝ်း တံပ်ကဘေဲမ်ကဒါႇပလိက်ဟိုခိုနီန်အောႏ။
ကဝ်အီဂေါည်ခေဲင် ပ္လေါည်ကတီုက်ကပဴင်နီန်အူအီး က္လာင်းတဖုင်ဆျှိုဖီမျေဒါႈ“ ကဲဘိူန်းဟာဝ်း ဟိုခိုနီန် စူန်အံပ်ကပံတ် 6 နြီ။ တံပ်ကဘေဲမ်ကဒါႇပလိက် ဟိုခိုနီန်မာ် ကဲဟည်ဘိူန်း။ ကဇေန်နီး ကဒါႇ TNLA ကဲ ဟည်က္လိုတ်ႎီရ်ဂေါည်နှာရိူဝ်ႇ ရဝ်ဟိုခို”
တိုအီးဂေါည်ကဒါႇရဝ်ဟိုခိုနီန် မိုႈပွံတ် 5000 ဟြဲင်လေႈ ခည်လံပ်တီုက်နာန်း 1027 ဒိူန် တံပ်ဆီုက်တအာင်း ကာည်း တံပ်ကပိုမ်ကဲစီ ဘယ်ဒေတီုက်ဆီမ်းဟာဝ်းအောႏ။
ကဝ်အီမိူဝ်ႈ အခွါင်းအရေးကြောႈက္လာင်း ခေဲင် PSLF/TNLA ကဲ အ်ုန်အီမိုႈ လိုည်းယေဦး က္လာင်းခေဲင်ပ်ုန်ကဘ္လာင်းကဲတ ဆဒါင်နီန် ခည်ကျံရ်အောဂ်ုတ် ဆငည်း 5 ဒိူန်ဒါႈကဒါႇTNLA ကာည်း တံပ်ကပိုမ်ကဲမာ် ရီန်းအူန်းဒေႎီရ်တီုက်ဟာဝ်း ဆီုက်ငါးတံပ်ကညာအာဏာဆီုက်ဇေဝ်ကဲအောႏ။
တယ်လီဂရမ်ချှံန်နယ်အီထာ့်ခါမ် တံပ်ကညာအာဏာဆီုက်ဇေဝ်ကဲမာ် ကိက်ဒါႈကဲဟည်ဘယ်ဒေထိင်ခြဲ တံပ်ကဘေဲမ်ပလိက်ကဒါႇ ဟိုခိုနီန်အောႏ။
ဘံန်ဟောည်ႇပ္လေႈႎီရ် TNLA ကဲ ကာည်း တံပ်ကပိုမ်ကဲတ ကီုင်းနော်င်ခေဝ်နီန် တတည်း တံပ်ကညာအာဏာဆီုက်ဇေဝ် ကဲဟည်ထိုးလီပ်ဘိုး ကဒါႇမိုဂူႈနီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
