ယာရူစိင်၊ ကျံရ်ဇူန် ဆငည်း 20၊ မိူင်းဘောက်
ပမိူင်းဘောက် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက် ‘ဝ’ – UWSA ကဲနီန် ဂေါႇမိုႈဘည်ကိူဝ်ႈ မြေရှားသတ္တုနီန် ဆမာလတိုအီးခေဲင်အရာပ် စီပဲန် SHRF မှာန်းကနာည်နံင်ဇံင်းဒါ့်အောႏ။
ဖုင်အခွါင်းအရေးတိုအီးဆျှံမ်ကဲ ပ္လိူရ်ႈလေႈ အမှိူဝ်ကျံရ်ဇူန် ဆငည်း 19ဒိူန်ဒါႈ တအရာင်ပ်ုန်ငါ်ႈဒါဂြိုလ်တုနီန် ယိူဝ်းဘည်ပဘိုးကိူဝ်ႈဒေဲႈ UWSA ကဲ တမြေရှားသတ္တုနီန် မှယ်ဒိုရ်ဆန်ုမ် 2015ဒိူန် 8ပူန်အောႏ။
ခည်ဇူႈဆန်ုမ် 2015ဒိူန် ဘီုင်မြေရှားသတ္တုနီန် ဘိူည်မိူဝ်ႈဒေဲႈလိူည် 3လှေမာ် တောပ်ဘည်ရူပ်ရာင်ပ်ုန်ငါ်ႈဂြိုလ်တု ဆန်ုမ် 2025 ကျံရ်ေႎှဲပ်ဘျူရီနီန် တေဲင်ဂေါင်ကဒါႇက်ြုမ်ကီုင်း ဟည်ယိူဝ်းပွံတ်ဘီုင် မြေရှားသတ္တု 26ဘီုင်လေႈအောႏ။
ကဲပ္လိူရ်ႈအူန်းဘိုး ဂေါႇဘည်ပဘိုးကိူဝ်ႈဘီုင် မြေရှားသတ္တုနီန် အ်ုန်ဆမာမိူဝ်ႈဖါ်ႈ ဖေးရာန်ကနာည်ဒိုႈအိုမ် ခေဲင်ဘီုင်သတ္တု 3လှေမာ် အ်ုန်ကဒိုင်းလိူည်တောပ်ကီုင်း 3ကီလိုမီတာ 4ကီလိုမီတာအောႏ။
လဲင်ႏဟာန် အ်ုန်အီမိုႈအီမိူဝ်ႈ အခွါင်းအရေးကြောႈက္လာင်း ခေဲင် SHRF နီန် က္လာင်းဒါႈ “တံင်ဒါင်းအ်ုန်မိုႈ ဘည်ကိူဝ်ႈမြေရှားသတ္တုဒီးကော်။ ဆံမ်ကိူဝ်ႈဆံမ်ဒီမှော အရာပ်မှော အဆေဆံမ်ကိူဝ်ႈဒီးကော်။ အ်ုန်ဆမာလကဆဝ်း တိုအီးခေဲင်အရာပ်ကဲ။ အရာပ်အရာ ဆဖာဝမာ် အ်ုန်လကဆဝ်း။ တံင်ဒါင်းအ်ုန် ထာန်မှောအ်ုန်တိူဝ်လ ကူန်ရဝ်မာဂါင်ကဲ တိူရ်ႈလိူည် အိုမ်ဒါင်ကဒည်ကီုင်းဒီး။ ဂေါႇမိုႈအ်ုန်ဆမာ ပ်ုန်ကဒူးအိုမ်နဒီ စီပဲန်ဆိင်မှာန်း ကနာည်နံင်ဇံင်းဒါ့်။ တိုအီးခေဲင်အရာပ်ကဲမာ် ဂီုည်မှာန်း ကနာည်နံင်ဇံင်းဒဲႈ”
ဘည်ကတျံရ်အိုမ်ခြံင် အီမိူဝ်ႈပုင်ရံင်က္လံင် အ်ုန်အီတချာ ပဒီဘီုင်သတ္တု အ်ုန်အီဂေါည်ရီမ်းမိူင်ဘောက်နီန် ဂီုည်နှေရ်နှဲန်ပွံတ် တောပ်ဇီုင်းကာန် လံပ်ကိူဝ်ႈမြေရှားသတ္တု အ်ုန်အီဂေါည်ပကပီုန်ခါင် ဒီဒီန် အ်ုန်မိုႈ ရဒေင်ဒီဒါတ ထုက်လာည်းတည့်ရည့် ခြူမ်ကတာည်းယာ့်အောႏ။
ကဲဒါႈ အရာင်ရည်း ပ်ုန်ဟြာင်းဒေဲႈ တိုအီးခေဲင်အရာပ် ကဲအီရေဲန်ဇီုင်းသတ္တု ရီမ်းပြောကီုင်းမိူင်းဘောက်ကဲဒီန် တေဲင်အော်န်လဴင်မာ် ဂီုည်နှဲအူန်း စဲင်စဲင်ဟြဟြ မိုႈတကဲဒါ ရဒေင်ထုက်လာည်း ခြူမ်ကတာည်းဒီန်ယာ့်အောႏ။
ကီုင်းမိူင်းဘောက်နီန် အ်ုန်မိုႈဖါ်ႈကီုင်းအီဒါင်း နံမ်ဘာတ်အာရ် ခေဲင်အရာပ်ကဒါႇပိူည် UWSA ကဲ အ်ုန်ဂေါည်ကဒါႇက်ြုမ်လေႈဆာင်ငည်း ကီုင်းပါင်ဆာင်း ကဒိုင်း 25 ကီလိုမီတာအောႏ။
တောပ်ဘည်ပ္လါႇဘေဲႇပ်ုန်ဟြာင်း “Trapped in Hell” SHRF ကဲ ကီုင်းမိူင်းဘောက်နီန် အာည်ႇတီုက်ယာႈ ကုင်ခယ်ကဲတ ဇီုင်းခ္လံဝ်းရိူန်းတေဲင်အော်န်လဲင် ပကအူရ်ဆျှံမ်ကာည်း ကအူရ်ခယ်နီန် အ်ုန်မိုႈဇီုင်းကာန်း ခ္လံဝ်းရိူန်းဒါင်း တေဲင်အော်န်လဴင် ခေဲင်အရာပ် UWSA ကဲ အူလှေယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
