လိုည်းဇူန်မိုး၊ ကျံရ်ဇူန် ဆငည်း 4၊ မုံးကိုး
ဒီဘိူန်းတံပ်ကိုကာင် MNDAA ကဲတထိင်ခြဲ ကပီုန်ဆျှံမ် ကဒါႇပိူည် လှံင်မူစယ် ရဝ်အ်ုန်အီဂေါည် ခေဲင်ကီုင်းမုံးကိုး ပေန်ခ္လကဲဒိူန် ဂေါႇမိုႈ ကဲဘိအူန်းကျောင် ဟည်လှေင် 5 ဆန်ုမ် ဂေါႇဘည်ဒီန် တိုအီးအရာပ်ကဲမှာန်းဒါႈ ဆိင်ဒဲႈအေ့ကဲႎီရ်ႎိူဝ်ႈဟာဝ်းကျောင်နီန်အောႏ။
တိုအီးအ်ုန်အီဂေါည် ပအရာပ်ဒီန် ကောန်အီမာည်း အူအီးက္လာင်းဒါႈ ရဝ်ပန်စီတိုင်း၊ နမ့်ဟာ၊ နမ့်ဝါ၊ မန်ကောင်း(ပန်ဟိုင်)၊ ရှောက်ရွှေစင်၊ ရဝ်ဖာငပ်(ရဝ်ကမာည်း) ရဝ်ကဲဂဲနီန် ဇူႈဒါ ချီုင်ပဲန်ဝရောဂါ အိုရ်ဆီုင်ဆန်ုမ် 2020 ဒိူန် ကဲဘိဟာဝ်းကျောင် ကံပ်ရောတ်ဆန်ုမ် 2025 နီန် ဟည်ဘိူန်း 5 ဆန်ုမ်အောႏ။
“ ကဲက္လာင်းအေ့တောပ် MNDAA ကဲ ကဲနှေရ်လိူည် နံင်ႎိူဝ်ႈဒဲႈကျောင်ခယ်နီန် ခည်ဂီုန်း။ ကဲညှံမ်စိူ၀်ႈစိ ကျောင်ဘြာန်။ ကျောင်ခယ်မာ် ကဲညှံမ်ႎိူဝ်ႈဒဲႈစိ ကဇေန်နီး။ နှေရ်နံင်လိုရဲ့ဘိုး အူဆန်ုမ်။ ယဲစီဆိင်ႎိူဝ်ႈပွံတ်ဆန်ုမ်နီန်။ ဘိအူန်း ဟည်ဘိူန်း 5 ဆန်ုမ်။ ကျောင်မာ်ဟည်လူလှဲဝ်ႏဒိုည်ႇ”။
ကောန်အီမာည်း ကဝ်အီဒါႈရကႎိုည်နီန် ဆီုပ်ဒါႈဘိုး ခေဲင်ဆန်ုမ် 2025 နီန် ကူန်ရဝ်မာဂါင်ကဲဒါႈ ကနာည်နံင်ဘယ်ကဲတ ႎီရ်ႎိူဝ်ႈကျောင်နီန်ရာင်ဒေ ဂေါႇဘည်ဒီန် ကဲလိုပ်ုန်ကဇောည် ဂြိုခြီုင်ပ်ုန်ကိက်၊ပံပ် ကာည်း တာဆြာ၊ယာဆြာအောႏ။
“ ခေဲင်ကီုင်းမုံးကိုး ကာည်း ပရဝ်ဖောင်းဆိုင် ကဲႎိူဝ်ႈကျောင်ဘြာန် ဆီုင်ဆန်ုမ်အာည်ႇ။ မိူဝ်ႈဘိုးကျောင်အူကျောင် ကဲစီႎိူဝ်ႈဟာဝ်းကျောင်ခယ်။ ပခမိုပေန်ခ္လစီ ကဲညှံမ်ႎိူဝ်ႈစိ”
ကဲဒါႈ တံပ်ကိုကာင် MNDAA ကဲ ႎိူဝ်ႈဒဲႈကျောင် ပရဝ်ဖောင်းဆိုင် ကာည်း ခေဲင်ကီုင်းမုံးကိုးနီန် ခည်ဆန်ုမ် 2024 ဒိူန် ရဝ်ကဲဟံရ်စီ ညှံမ်မိူဝ်ႈစိ ဘည်ႎိူဝ်ႈဒဲႈကဲတ ကျောင်ပနောဘေဲႇနီန်အောႏ။
ကီုင်းမုံးကိုးနီန်မိုႈ တံပ်ဆီုက်ကိုကာင် MNDAA ကဲ တီုက်ဘိူန်းဟာဝ်း ခည်ဆန်ုမ် 2023 ကျံရ်နိုႎဲမ်ဘာ ဆငည်း 7 ဒိူန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
