လိုည်းဇူန်မိုး၊ ကျံရ်နိုႎဲမ်ဘာ ဆငည်း 3၊ပင်းတယ
ကပီုန်ဆျှံမ်ကဒါႇပိူည် ခေဲင်အရာပ်ဓနု ပလှံင်ပင်းတယနီန် ဆီုက်ဆျှံမ် RCSS ကဲ တိုည်းဟာဝ်း ကောန်အီမာည်း 20 အီး စောည်ဒါႈမိုႈ ကဲဒါခံင်မံဝ်း။
ကဝ်အီနံပ်ဘည်မိုႈဘည်ဘာည်း ကောန်အီမာည်းအူအီး က္လာင်းဒါႈ ခည်ကျံရ်အံက်တိုဘာ ဆငည်း 26 ဒိူန် ဆီုက်ဆျှံမ် RCSS ကဲ စောည်ဒါႈမိုႈ ကဲဒါခံင်မံဝ်း တိုည်းဟာဝ်းကောန်တဘိုက် မိုင်းအင်၊ ဆင်ကျုံး၊ အိုးကုန်း၊ ကျောက်ပလ္လင်၊ တောင်ပု၊ မြေနီကုန်းကဲ 24 အီး။
“ မိုႈအေ့ ကဲဒေဲႈတိုည်းဟာဝ်း တိုအီးဒါခံင်မံဝ်း 2 အီး။ ကဲဟည်တိုည်းဟာဝ်းဖါ်ႈကဲ တောႇဘိုးဂေါအ်ုန် တောပ်ပည်အီအာဝ်ဒါကဲဒီန် ကဇေန်နီး ဟည်ဂေါည် 24 အီး။ ႎီရ်ရောႈဒါရိူန်းမာ် အာဝ်ဘိူန်း။ ကဲအာဝ်ရံပ်ခါမ်။ ကဒါႇယဲ ဆာ်ကဲဒေဲႈရောတ် ပဲန်ခည်းနောႈကီန်း။ ဘည်နံင်ဟာဝ်းႎီရ်မာ်ကီန်းဒည်း။ ကနာည်နံင်လီပ်လေႈမာ် ကတူႈဒုက္ခ”
ခေဲင်ကဲအီကတူႈတိုည်းကဲနီန် အ်ုန်တောပ်ပည်အီဒါခံင်မံဝ်း ကဇေန်နီး ပ်ုန်တိုည်းဟာဝ်းကဲ ဘိူည်ဒါႈဟည်ဂေါည် 24 အီးမာ် ဖုင်ဆျှိုည်ဖီမျေကဲ ညှံမ်ဘယ်စိဒေနံပ် ကတီးကရီးအောႏ။
ကဲဒါႈ ကံပ်ရောတ်ကဇေန်နီး ကောန်အီမာည်း ပ်ုန်ကတူႈတိုည်းကဲဒီန် ညှံမ်ဘိူန်းစိ လည်ယိူဝ်းတောပ်ရမာ်ကဲ မိုႈဘိုးဒီမှောကဲ ကတူႈတိုည်းအူန်းမာ် အာဝ်နံပ်အောႏ။
ဘိူန်းအယ်နံပ်တောပ်ဘည်က္လာင်း တိုအီးအရာပ်ကဲဒါႈ ဂေါႇပ်ုန်မှာန်းကဇောည် တံပ်ဗထူးနီန် တံပ်ဆီုက်ဆျှံမ် RCSS ကဲရေဲန်ဖါ်ႈဂေတ်ကဲ ဒီလီပ်ခေဲင်ရဝ်မိုင်းအင် ပလှံင်ပင်းတယနီန်အောႏ။
ဘိူန်းနံပ်တောပ်ဘည်က္လာင်းတိုအီးအရာပ်ကဲဒါႈ ခည်ကျံရ်အံက်တိုဘာ ဆငည်း 28 ခီညှာကပံတ် 10 နြီဒိူန်မာ် ကောန်အီမာည်း ကဝ်အီဇီုဝ် ကိုရဲဝင်းနိုင် ဘိူန်းအဆာက် 23 ဆန်ုမ် အ်ုန်အီယိူဝ်ႇဒေဲႈ ကဒါႇရဝ်လှည်းတိုး ဒါႈနံင်ဟာဝ်းခေဲင်လှံင် ပင်းတယ ပရဝ်မိုင်အင်နီန် RCSS ကဲ ပဴင်ယံမ်းဟာဝ်းအ်ုန် ပဂေတ်ရဝ်မိုင်အင်းဒီန်ဒါႈ ဂေါႇမိုႈ ယဲဂျဲတ်ကား အ်ုန်အာဝ်ဇံင်း။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
