လိုည်းလာဝ်ဇာရ်၊ ကျံရ်ဆဲပ်တီမ်ဘာ ဆငည်း 10
ကူန်ရဝ်မာဂါင်ကဲ ထာ့်ခါမ်ဖါ်ႈ တေဲင်ပ်ုန်ဘိဟာဝ်း KTV အီဂေါည်ခေဲင်အရာပ် ပ်ုန်ထိင်ခြဲအူန်း တံပ်ဆီုက်တအာင်း PSLF/TNLA ကဲနီန် တိုအီးခေဲင်အရာပ်ကဲမာ် ဂီုည်လိုအူန်း ကနာည်နံင်ဘိႎီုန်ဒိုည်ႇ ဆဴင် KTV၊ ႎှါင်းမာဆဲတ်ကဲနီန်အောႏ။
ကောန်အီမာည်း ကဝ်အီဂေါည်ပအေဲမ်ကိုက်နီန်အူအီး က္လာင်းဒါႈ ပအေဲမ်ကိုက် ၊ အိုမ်ငျံရ်၊ ဆဘော၊ မာဝ်းႎံင်း၊ မိုဂူႈကကာည်း မိူင်းမီတ်နီန် အာဝ်မိုႈလိူည် ဘိအူန်း ဇိုချီုင်လံပ်တီုက်ႎှီုန်းနီန်အူကဇီန် ဆိင်ဒဲႈပွံတ်မိုႈ ဘိအူန်း ဂါလံပ်တီုက်ႎှီုန်းနီန် အာဝ်ဟောည်ႇဟာဝ်းအောႏ။
အ်ုန်ဒါႈဘိုး မိူဝ်ႈအူန်းအီးဆြားအူန်း KTV နီန်ပေန်ကျံရ် နောႈအာနာ ကောန်ဆီုက်ကဲအီဘ်ုပ် ဟာဝ်းကတီုက်ရအာည်ႇကဲဒိူန်မာ် အာဝ်မိူဝ်ႈ။
ကောန်အီမာည်း ကဝ်အီဂေါည်ပအေဲမ်ကိုက်နီန်အူအီး က္လာင်းဒါႈ “မိူဝ်ႈတောန်ဒီ။ အီဟာဝ်းရအာည်ႇကဲဒိူန်မာ် အာဝ်အာနာ မိူဝ်ႈအူန်းဘည်ဆြားဖါ်ႈလာ်ဒါ KTV နီန်ပါ်ကျံရ် စီလီပ်ပျော။ ဘည်မိုႈဘည်ဘာည်း ဘည်လီပ်ကဲ ခေဲင် KTV ဒီန်မိုႈ ကဲလီပ်ကဇိူရ်ႈကယံင်း K ၊ ဆျှိုည် လာက်နာက်ကဲဂဲနီန်ယာ့်။ ကောန်ဆီုက်ကဲအီဟာဝ်းရအာည်ႇကဲဒိူန် စီဘ်ုပ်ဆွံင်ဖါ်ႈ အဆာက်၊ နှာမ်၊ အိုမ်ရမူရ်ႈ ဇိူင်တည်းကဲ ဂေါည်ဖါ်ႈခနားဖေးရာန် ပေါမ်မာ်အာဝ်ဘိူန်းဟောမ်ဆေ ရူရ်ႈကျံရ်ကဲမာ် ဆလိက်ကနာည်နံင်ညွံတ်လိူည် အာဝ်ဂိူပ်”
အ်ုန်ဆီုပ်က္လာင်းဒါႈဘိုး ဆဲႈဒါႇဒီန် ဂေါႇ KTV ဘဝ်ရမာကဲအီဘ်ုပ် ကကာႈကယာႈဟာဝ်းကာည်း အီလူလေဲဝ်ဟာဝ်းကဲနီန်မာ် ယိူဝ်းဂီုန်းခည်းအောႏ။
“ဆိင်ဒဲႈကဲ ဘိႎီုန်ဒိုႇ KTV ကဲနီန်။ ဂေါႇဆေဘာည်းမိုႈ ကဲအီပဲန်ဟာဝ်း ဘဝ်ရမာကကာႈကယာည်ကဲဒိူန်မာ် မိူဝ်ႈဂီုန်းခည်း။ ဆဲႈဒါႇဒီန် ကောန်ကညောမ်ကဲအီလူလေဲဝ်ဟာဝ်းကဲဒိူန်မာ် ဂီုန်း။ အာဝ်ဆိင်ဒဲႈစိ ကောန်တဘိုက်ကဲအီယိူဝ်ႇဘံန်းကဲဒိူန် လူလေဲဝ်ဟာဝ်း။ ဂေါႇ KTV မံင်ခ္လမာ် ဟည်မိူဝ်ႈဒိုႇ တာဒဲႇ၊ ယာဒဲႇ။ တောပ်ဘိုး ကောန်အီပ်ုန် ကဲအီဟောည်ႇမိူဝ်ႈ မေဲန်ကဲဒိူန်ယာ့်”
မိူဝ်ႈဘိုး ကောန်အီမာည်း ကဝ်အီဂေါည် ပအေဲမ်ခြီရ်နီန်အူအီး က္လာင်းဒါႈ ဂေါႇခံင်မဝ် ပ်ုန်ဒါအီးခေဲင် KTV ကဲအီမိုႈ K၊ ဆျှိုည်ကဲဒိူန် ကောန်အီပ်ုန်ဒဲႇ ကဲအီအာဝ်မှိူမ်လူမာ် ဟည်လူ ဘဝ်ရမာအာဝ်မှိူမ်ကယာႈမာ် ဟည်ကယာႈဒိုႇအောႏ။
“ဘည်ဘိဟာဝ်းကဲ ပအေဲမ်ခြီရ်နီန် အောထာ့်ခါမ်ခည်း။ ကောန်အီပ်ုန်ကဲ တျံင်ဖါ်ႈလာ်ဒါ K မဝ်ဖါ်ႈ ပဲန်ဟာဝ်းဒိုႇ ခံင်အာဝ်မှိူမ်ပဲန်။ ဆဲႈဒါႇဒီန် ခူန်ကဲမာ် အာဝ်မိုႈစိခူန်တောန်အီး။ ကဲစီဘယ်ဒေ ဟာဝ်းဒါရိူန်းပဒီဒီန်။ ကဲအီဘ်ုပ်ဟာဝ်းကတီုက်ရအာည်ႇကဲဒိူန် စီအာဝ်မိူဝ်ႈဆေ။ လဒိုရ်ကဲဟာဝ်းဒါပဒီကဲနီန် ဆာ်ဒါကနာည် ပ္လေါည်ကတီုက်ကပဴင်ကဲနီန် ထာန်မှောကံပ်နံင်မိူဝ်ႈအကျိုး။ ဆာ်အယ်ဒါႈမာ် ဂီုည်ယိူဝ်းဘိုးတငါဝ်းကဲဒါႈ ဂေါႇယဲမိူဝ်ႈရိူန်း ယဲစီဘယ်ဒါ။ ဆာ်မိုႈဘာည်းဒီန် ယိူဝ်းလိူည်မိုႈ ကဲအာဝ်မိုႈအီအွံရ်ကျန။ မိူဝ်ႈဘိုးအူလှေ ကဲအီမိူဝ်ႈဘဝ်ရမာကဲဒိူန် ဆာ်ကဲဒဲႈရိူန်းကဲဒီန် တရဟောမ်ရမာကဲ ထာန်မှောကံပ်နံင်မိူဝ်ႈအကျိုး”
ဇူႈပွံတ်ကျံရ်ဆဲပ်တီမ်ဘာ ဆငည်း 3ဒိူန် TNLA ကဲ ပ္လူႈဖါ်ႈဆဒိ ပ္လိူရ်ႈကနာည်နှာင်းဘိအူန်း ဆဴင် KTV ကဲနီန် ဇိုချီုင်ပ္လူႈအူန်းတဆဒိ ဆာ်မိူဝ်ႈအီလူည်ႇခေါပ်ပြာႇ ႎိူဝ်ႈဟာဝ်းဆဴင် ကဲဒါႈ ကဲနံင်တိူဝ်ႈလာည်းအရေး ဒါင်းဒါင်းယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
