ပိုႈလဘား၊ ကျံရ်ဒီဆဲမ်ဘာ ဆငည်း 27၊ မိုင်းယုလေး
တိုအီးအရာပ်ကဲ အူအီးက္လာင်းတဖုင်ဆျှိုည်ဖီမျေဒါႈ ကပီုန်ဆျှံမ်ကဒါႇပိူည် ပလှံင်အေဲမ်ကိုက် ခေဲင်ခမိုရဝ်မိုင်းယုလေး ပရဝ်ဟိုခိုနီန် ကောန်ဆီုက် တံပ်ဆီုက်ဆျှံမ် SSPP ကဲ ခနားကဲ ပဲန်လည်ပဴင်ဟာဝ်း ကောန်ဆီုက်ကဲ အူအီးယံမ်းဖါ်ႈ အူအီးကတူႈဖေးဘာတ်ဟာဝ်းအောႏ။
ခည်ကျံရ်ဒီဆဲမ်ဘာ ဆငည်း 25 ဇူန်အံပ် ကပံတ် 8 နြီလေႈအိုည်ကိူရ်မနေတ်ဒိူန် အ်ုန်အီမိုႈတာဘြောင်ရဝ်ဟိုခို ကာည်း တံပ် SSPP ကဲ ခိင်ဒေဲႈတောႇကဲ အ်ုန်အီဇီုဝ်ကိုအိုက်ယီထော် အ်ုန်အီလာည်းအခွါင်းနီန် ခိင်ဒီန်ကဲပဲန်လည်ကပဴင်ဟာဝ်းခနားကဲႏ။
ကဲဒါႈ “ အ်ုန်လာည်းဖါ်ႈအခွါင်းစီ ႎီရ်တဂါင်။ ဘံန်ရောတ်အ်ုန်တဂါင် အ်ုန်ဂီုည်တျံင်လိူည်အိုမ်ဘာႈနီန် ဂေါည်ဘည်ဒီန် တံပ်အ်ုန်ကဲစီ ဒေဲႈတောႇအ်ုန် ကနာည်နံင်ဂေါည်ခေဲင်တံပ်နီန်။ တားဘြောင်ရဝ်ကဲစီ တောႇကောန်ဆီုက်ကဲပေန်ခ္လစီ ဟာဝ်းတောႇအ်ုန်ပဂါင် ခိင်ဒီန်အ်ုန်မာ် တိူဝ်ႈဘိုတ်တောပ်ဒေကိုႈ ကောန်ဆီုက်ကာည်း တားဘြောင်ရဝ်နီန်။ ခိင်ဒီန် ကောန်ဆီုက်ကဲ ကာည်း တာဘြောင်ရဝ်ကဲဆူတ်ႎီရ်ဖါ်ႈစီငျားဒေဒူႈ တံင်ဟေ။ ဒီဒီန်အ်ုန်မာ် တိူဝ်ႈဖါ်ႈဆနာတ်စီပဴင်ကောန်ဆီုက်ခေဲင်ကဲအူအီး။ ကောန်ဆီုက်ကဲဒီန်မာ် ႎီရ်ပဴင်ဘိုးအ်ုန် အ်ုန်စီယံမ်းဟာဝ်းပွံတ်ဒီဒီန်”။
ဘံန်ပဲန်ဟောည်ႇကဲတ အမှုလည်ကပဴင်ဒီန် အ်ုန်အီမိုႈ ဦးအိုက်ယီထော် ကောန်ဆီုက် SSPP ကဲ အ်ုန်အီဘိူန်း အဆာက် 45 ဆန်ုမ်နီန် ယံမ်းဟာဝ်းဖါ်ႈ ကဝ်အီဇီုဝ် ကိုလာဝ်ဝူး အ်ုန်အီမိုႈကောန်ဆီုက် SSPP ကဲစီ ကတူႈဖေးဘာတ်ဟာဝ်းဖါ်ႈ ကဇေန်နီး အ်ုန်ရံပ်ခါမ်ဘာည်းဆနံမ်း ပယုင်ဆနံမ်ဒါင်းလှံင်အေဲမ်ကိုက်နီန်အောႏ။
ဘိူန်းအယ်နံပ်တောပ်ဘည်က္လာင်း ကောန်အီမာည်း ကဝ်အီဒါႈရကႎိုည်နီန်ဒါႈ တိုပိုင်းခန္ဓာယံမ်း ဦးအိုက်ယီနီန် ကဲဟည်သဂြိုလ်ဒဲႈအ်ုန်အမှိူဝ် ကျံရ်ဒီဆဲမ်ဘာ ဆငည်း 26 ဘံန်ဆံန်ဒိူန် ကနာည်ကာန်အ်ုန်မာ် ကဲဒါႈ တံပ် SSPP ကဲဒါႈနံင်ရံပ်ဟာဝ်းဇီုင်ကပ္လိူင်အ်ုန်အောႏ။
ကဝ်အီကပ္လါႇဘေဲႇဆဒါင် – လိုည်းပို;ဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
