ပိုႈလဘား၊ ကျံရ်အောဂ်ုတ် ဆငည်း 18၊ မိုဂူႈ
တံပ်ကညာအာဏာဆီုက်ဇေဝ်ကဲ ဟည်ပျောႈဘိုးဘျုင်ဒီထိင်ခြဲတံပ်ဆီုက်တအာင်း PSLF/ TNLA ကဲ ပကီုင်းမိုဂူႈ ကဒါႇလီပ်ဆာင်ငည်းနီန် တိုအီးအရာပ်ကဲ အူအီးကတူႈဖေးဘာတ်ဟာဝ်း။
အဒိူဝ် ကျံရ်အောဂ်ုတ် ဆငည်း 18 ဘံန်ဆံန် ကပံတ် 3 နြီလေႈဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဂျက်ဖိုက်တာ ပျောႈဟာဝ်းဘျုင်နီန် ရီမ်းပြောနာရီစင် ကဒါႇလီပ်ဆာင်ငည်းနီန်အောႏ။
တိုအီးအရာပ်ဒီန် ကောန်အီမာည်း အူအီးက္လာင်းဒါႈ “ ကဲပျောႈဟာဝ်း ပမိုဂူႈ ကဒါႇလီပ်ဆာင်ငည်း ကဒါႇကျပ်ပြင်နီန်။ အ်ုန်နံင်မိုႈ ကဒါႇကျပ်ပြင် ရီမ်းပြောနာရီစင် ပကျောင်ယာခါဝ်။ ကဲဒါႈ အ်ုန်လ အူအီး”။
ဖုင်ယဲဆျှိုည်ဖီမျေမာ် ဂီုည်ဆီုပ်တခေါရ်အူန်းဘိုး တောပ်ဘည်ပျောႈကဲတ ဘျုင်နီန်အောႏ။
ဘာည်းလိူည်ဒီန် အဒိူဝ် ခီညှာ ကပံတ် 8 နြီလေႈ 30 မနေတ်ဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ပေါင် 500 နီန်အာရ်ပိုင်း ခေဲင်ကီုင်းဆဘောနီန် တိုအီးအရာပ်ကဲ 3 အီးကတူႈဖေးဘာတ်ဟာဝ်းဖါ်ႈ ဂါင်ဂေါည် 9 ကြောင်လူလှဲဝ်ႏဟာဝ်းအောႏ။
ဆဲႈဒီန် အမှိူဝ် ကျံရ်အောဂ်ုတ် ဆငည်း 17 ခီညှာ ကပံတ် 9 နြီဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ပမိုဂူႈကဒါႇလေႈဆာင်ငည်းနီန် တောပ်ပည်ကောန်ကညောမ်အူအီး 3 အီးယံမ်းဟာဝ်း။ ခည်ဆငည်း 14 ဒိူန်မာ် ကဲပျောႈဟာဝ်း ပမိုဂူႈကဒါႇလေႈဆာင်ငည်း ခနားရဝ်ရွာသစ် ကာည်း ရွှေကူနီန် တိုအီးအရာပ်ကဲ ယံမ်းဟာဝ်း 21 အီး 10 အီး ကတူႈဖေးဘာတ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
