မာည်းဖိူမ်းဆငဲ၊ နိုႎဲမ်ဘာ ဆငည်း 28၊ အေဲမ်ကိုက်
ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ပကပီုန်ဆျှံမ်ကဒါႇပိူည် ခေဲင်ကီုင်းအေဲမ်ကိုက်နီန် ကောန်ကညောမ်အီအာဝ်မိူဝ်ႈကူန်မာ ပ်ုန်တိုည်းမဲႈယံမ်းဟာဝ်း ကောန်ဆီုက်တံပ်ကိုကာင် MNDAA ကဲအီရဲ့ဝါင်းပိုႈနီန် ကံပ်ရောတ်ကဇေန်နီး ကဲညှံမ်ဒေဲႈကဇောည်စိအောႏ။
တံပ်ကိုကာင်ကဲ တိုည်းဟာဝ်း မည်းအိုက်တုံ ဘိူန်းအဆာက် 14 ဆန်ုမ် တိုအီးရဝ်လွယ်အူန်နီန် ခည်ကျံရ်အံက်တိုဘာ ဆငည်း 5 ဒိူန် ဘံန်ရောတ်ကျံရ်အံက်တိုဘာ ဆငည်း 10 ခေဲင် 5 ဆငည်းနီန် မာည်းအိုက်တုံယံမ်းဟာဝ်းအောႏ။
ကဝ်အီကဒံပ်တောပ်အ်ုန်က္လာင်းဒါႈ “ ပ်ုန်ပျံမ်းဟာဝ်း MNDAA ကဲအ်ုန်အာဝ်မိူဝ်ႈစိကူန်မာ။ အ်ုန်ဂေါည်တောပ် တာကာည်းယာ။ ဘံန်ကျံရ်ဘာန်းဆငည်း 3 နီန်ကဲနံင်ရေဲန်ကာန်အ်ုန်။ ဆငည်းကာန်အ်ုန်မာ် ဟည်မိုႈရောတ်။ ကနာည်ကာန်အ်ုန် ကဲအာမိူဝ်ႈစိရိူန်း။ ဖုင်အီကဆီုဝ်ကဆဲင်တောပ်လှေဒီန်မာ် အာဝ်ရေဲန်ဒဲႈစိဆေ”
ကံပ်ရောတ်ကဇေန်နီး ကဝ်အီမိူဝ်ႈဇီုင်းကပ္လိူင်ခေဲင်တံပ်ကိုကာင် MNDAA ကဲ ညှံမ်ဒေဲႈက္လာင်းက္ဘာင်းဆာင်လာင်းစိ တောပ်ပည်အမှုလှေအီယံမ်းဟာဝ်းဒီန်။
တိုအီး အီကဒံပ်တောပ် မာည်းအိုက်တုံနီန်ဒါႈ ကနာည်နံင်ရေဲန်ကာန် မာည်းအိုက်တုံ ဘံန်နံင်ရောတ်ဒေဲႈနီန် အ်ုန်ဂီုည်လိုရိူန်းပ်ုန်နံင်ကဇောည်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
