မာည်းရူပ၊ ကျံရ်ဒီဆဲမ်ဘာ ဆငည်း 11၊ မိုဂူႈ
ဘိူန်းအယ်နံပ် ဂေါႇပ်ုန်လီပ်ကမိုန်ဒဲႈခယ်ကဲနီန် ကပီုန်ဒါင်း မန်တလေး ကီုင်းမိုဂူႈ အ်ုန်အီရောတ်ခြူမ်ပ်ုန်ထိင်ခြဲ တံပ်ကညာအာဏာဆီုက်ဇေဝ်ကဲနီန် တိုအီးအရာပ်ကဲ ညှံမ်ႎီရ်ဒေဲႈစိအောႏ။
တိုအီးအရာပ်မိုဂူႈကဲအူအီး က္လာင်းတဖုင်ဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဘိုည်ဒဲႈအယ်ခ္လေါႈဟာဝ်းႎီရ် ဒီနံင်လီပ်လေႈခေဲင်ကီုင်းမိုဂူႈနီန်မာ် ဂေါႇမိုႈကဲဂီုည်စေတ်မေန်းကဆဝ်းဇာဝ်း ကဇေန်နီး တိုအီးကဲအီဒဝ်ဟာဝ်းဒါႇကီုင်းမိုဂူႈနီန် ညှံမ်ႎီရ်ဒေဲႈစိအောႏ။
ကဲဒါႈ “တိုအီးကဲအီဒဝ် ကဒါႇရဝ်ကဲဒိူန်စီ ကဲဟည်ႎီရ်ဒေဲႈ။ ကဲဒဲႈအေ့ အယ်ခ္လေါႈဟာဝ်းႎီရ်။ မိုႈလိူည်ကဲစေတ်မေန်းကဆဝ်း”
တိုအီးအရာပ်ကဲနီန် ဆဲႈဒါႇဒဝ်ဟာဝ်းကဲ ကဒါႇမန်တလေး ကာည်း ကီုင်းရန်ကုန်နီန် ကဒါႇအရာပ် အ်ုန်အီမိုႈဒီထိင်ခြဲ တံပ်လံပ်တီုက်ႎှီုန်းကဲနီန်မာ် ကဲဒဝ်ဟာဝ်းအောႏ။
ကဇေန်နီး တံပ်ကညာအာဏာဆီုက်ဇေဝ်ကဲ ဆဲႈဒါႇထိင်ခြဲကဲတ ခေဲင်ကီုင်းမိုဂူႈနီန် ဒေင်တောပ်မိုဂူႈ – မိူင်မီတ်နီန်မာ် ကဲထိင်ခြဲဖါ်ႈ ရဝ်အ်ုန်အီဂေါည် နှာရိူဝ်ႇကီုင်းမိုဂူႈ တောပ်ဒေင်မိုဂူႈ – မန်တလေးနီန်မာ် ကဲထိင်ခြဲဟာဝ်းအောႏ။
တံပ်လံပ်တီုက်ႎှီုန်း အရာပ်မိုဂူႈကဲ အူအီးက္လာင်းဒါႈ “ တိုအီးအရာပ်ကဲ ညှံမ်ႎီရ်ဒေဲႈစိ။ ကဒါႇမိုဂူႈ ကဒါႇလီပ်ဆငည်းနီန် အ်ုန်ဂီုည်မိူဝ်ႈအူန်းလံပ်တီုက်နာန်းယဲ။ ညှံမ်ဘိူန်းစိ က္လာင်းကတီးကရီးအောႏ”။
ဂေါႇပ်ုန်လီပ်ကမိုန်ဒဲႈခယ်ကဲ တံပ်ကညာအာဏာဆီုက်ဇေဝ်ကဲ လီပ်ဒေဲႈခေဲင်ကီုင်းမိုဂူႈ အ်ုန်အီမိုႈဒီပ်ုန်ထိင်ခြဲ တံပ်ဆီုက်တအာင်း TNLA ကဲခည်ကျံရ်နိုႎဲမ်ဘာ ဆငည်း 29 ကာည်း ဆငည်း 30 ဒိူန်အောႏ။
ဘံန်ႎီရ်ဘိူန်း တံပ်ကညာအာဏာဆီုက်ဇေဝ်ကဲတထိင်ခြဲ ကီုင်းမိုဂူႈ – မိူင်မီတ်နီန် အ်ုန်အီမိုႈ ပရဝ်ထိင်ခြဲ တံပ်လံပ်တီုက်ႎှီုန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင်အောႏ။
NUG ကဲပ္လိူရ်ႈလေႈ ခည်ကျံရ်ဒီဆဲမ်ဘာ ဆငည်း 6 ဒိူန်ဒါႈ ကဲဂီုည်ရေဲန်အူန်း ဖုင်လံပ်တီုက်နာန်း မိုဂူႈ – မိူင်မီတ်ကဲ ကနာည်နံင်တီုက်ဟာဝ်း တံပ်ကညာအာဏာဆီုက်ဇေဝ်ကဲအီလီပ်ဒေဲႈခေဲင်ကီုင်း မိုဂူႈ – မိူင်မီတ်နီန်အောႏ
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
