မာည်းအဆျှဴင်၊ ကျံရ်ဇူန်လည် ဆငည်း 22၊ တေင်နီန်
ဆဒါင်ခေဲင်အရာပ်ကဲ ဂီုည်ကိက်ဟြာင်းဒါႈ တံပ်ကိုကာင် MNDAA ကဲ ဟည်ဆဖော ကနာည်နံင်အာပ်ႎီရ် ကီုင်းတေင်နီနီန်တ တံပ်ကညာအာဏာဆီုက်ဇေဝ်ကဲအောႏ။
ဆဒါင်လေႈဒါႈ ခေဲင်နှားအီဘိုန်ဒေဲႈနီန် ဂေါႇပ်ုန်လီပ်ကမိုန်ဒဲႈခယ်ကဲ တံပ်ကိုကာင် MNDAA ကာည်း ကညာအာဏာဆီုက်ဇေဝ်ကဲ ရေဲန်ဟာဝ်းပါင်ကမိုန် ခေဲင်ကီုင်းလာဆေဝ် ပဟိုတယ်ဆင်နှစ်ကောင်နီန် စီဆဖောဟာဝ်းအောႏ။
တိုအီးအရာပ် ကောန်အီမာည်း အူအီးက္လာင်းတဖုင်ဆျှိုည်ဖီ မျေဒါႈ “ ကိုကာင်ကဲဒါႈနံင်ရေဲန် ယုင်ဆနံမ် ဒီက္လာႈပြီမ်။ ပ်ုန်ဒါႈကဲတနံင်ရေဲန်ယုင်ဆနံမ်ဒီန် ကဇေန်နီး ကဲဟည်ရလှဲဝ်။ လှေဟံရ်ကဲဂီုည်ဆီုပ်ရေဲန်လိူည်”။
ဆီုင်ခည်လေဆဒါင် ကျံရ်ဆဲပ်တာမ်ဘာ ပ်ုန်ဒါႈကဲ တံပ်ကိုကာင် MNDAA နီန် နံင်က္လိုတ်ႎီရ်ဒါႇကီုင်းတေင်နီနီန်မာ် ကဲဂီုည်ဆီုပ်ရေဲန်ဟာဝ်းလိူည် လံပ်အူပ်ဘြောင်ကဲအောႏ။
တိုအီးကီုင်းတေင်နီကဲအူအီး က္လာင်းဒါႈ “ ဆဒါင်ပ်ုန်ဒါႈကဲတ နံင်က္လိုတ်ႎီရ်နီန် ယဲယိူဝ်းအူန်းတငါဝ်း။ အာဝ်မိူဝ်ႈစိယိုး။ ဂေါႇဆေဘာည်းစီမိုႈ တိုအီး ကညာဇီုင်းကာန်ဒါင်းကဲ ဟည်ဟံပ်ဒိုည်ႇရိူန်း ပကီုင်းတေင်နီနီန်။ ကဇေန်နီး ကဲဟည်ကံပ်ဘိုး စြာင်းတိုအီး အနာည်နံင်ရေဲန် ကဘ္လျတိုနီန်”
အ်ုန်ဆီုပ်ဒါႈဘိုး ဆဲႈဒီန် ဆဴင်အ်ုန်အီဂေါည်ခေဲင်ကီုင်း တေင်နီနီန်မာ် MNDAA ကဲ ဆူည်ႇဒိုည်ႇကဲခ္လါည်ဟာဝ်း ဘေဲႇခယ် ကာည်း ဘေဲႇဘြာန်နီန်အောႏ။
ဆဲႈဒါႇကီုင်းတေင်နီနီန် အ်ုန်အီမိုႈဒီပ်ုန်ထိင်ခြဲ MNDAA ကဲ ကီုင်းကွမ်းလုံ ကာည်း ကီုင်းမုံးကိုးမာ် ဆဒါင်လေႈဒါႈမိုႈ တံပ်ကိုကာင်ကဲ နံင်အာပ်ႎီရ်တ တံပ်ကညာအာဏာဆီုက်ဇေဝ်ကဲ ဘိူည်ဘာည်းဒီန်မာ် ကဒါႇတံပ်ကိုကာင်ကဲဂီုည်ဆီုပ်ရေဲန်ဟာဝ်းလိူည် လံပ်အူပ်ဘြောင်ကဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
