မာည်းဖိူမ်ဆငဲ၊ ကျံရ်အံက်တိုဘာ ဆငည်း 16၊ မိုဂူႈ
ဘိူန်းအယ်တခေါရ်နံပ် မိုႈတ တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ပျောႈဟာဝ်း ပ္လေဘျုင် ပရဝ်ညောင်ကုန်းဂိုရ် လှံင်မိုဂူႈ ကပီုန်ဒါင်းမာန်းတလေး အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲအောႏ။
အဒိူဝ်ကျံရ်အံက်တိုဘာ ဆငည်း 16 ခိင်ညှာ ကပံတ် 7နြီလေႈအူကဒည်ဒိူန် ကဲဒါယာန်ပ်ုရ်ဂျက်ဖိုက်တာ ဒေဲႈပျောႈဟာဝ်း ပ္လေဘျုင် ပေါင် 250 နီန် 2ပိုင်းအောႏ။
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ပ်ုန်ပျောႈဟာဝ်းကဲ ပမိုဂူႈဒိူန် အာဝ်လစိတိုအီး။ အ်ုန်တိူဝ်ဟာဝ်းလိူည် ဒီဟျံင်အီးတအျံရ်။ အျံရ်ကံပ်အာဝ်မိူဝ်ႈလိူည်”
ခည်ကျံရ်အံက်တိုဘာ ဆငည်း 12ဒိူန်မာ် ဂေါႇမိုႈ တံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေဘျုင် ပရဝ်လယ်ကြီးကာည်း ရဝ်ပစီး လှံင်မိုဂူႈနီန် စီပဲန်တိူဝ်လူလေဲဝ်ဟာဝ်းပွံတ် ဂါင်ဂေါည် 2ကြောင်အောႏ။
ဇူႈပွံတ်ကျံရ်အံက်တိုဘာ ဆငည်း 2ဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ပျောႈဟာဝ်းဖါ်ႈ ပ္လေဘျုင် ခေဲင်အရာပ်ပ်ုန်ထိင်ခြဲအူန်း PSLF/TNLA ကဲ တောပ်ပည်ကောန်ကညောမ် 6အီး တိုအီးရဝ်ဟည်ယံမ်းဖါ်ႈ 33အီး အီဘာတ်ဂေါည် 30အီး အာဝ်ယောမ်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
