မာည်းရူပ၊ ကျံရ်ဒီဆဲမ်ဘာ ဆငည်း 4၊ မိုဂူႈ
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ အမှိူဝ်ကျံရ်ဒီဆဲမ်ဘာ ဆငည်း 3 ခိင်ညှာကပံတ် 12နြီဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ဒေဲႈပျောႈဟာဝ်းပ္လေ ပရဝ်ထင်းရှူးတောင် အ်ုန်အီဂေါည် ရီမ်းကီုင်းမိုဂူႈနီန်အောႏ။
အ်ုန်ဒါႈ “ကဲပျောႈဟာဝ်း ကဒါႇပြောင်ခေါင်း၊ ဘားနက် ထင်းရှူးတောင်ယာ့်။ အ်ုန်ဇောႈခေဲင်လိုင်း တံင်ဟေ။ ဘံင်ဇေန်နီး ညှံမ်မိူဝ်ႈစိ ဘည်ထိုးတံပ်ကညာအာဏာဆီုက်ဇေဝ်ကဲတ လံပ်တီုက်နာန်းနီန်”
ရဝ်ထင်းရှူးတောင်နီန် အ်ုန်ဂေါည်ဖါ်ႈ တေဲင်ဂေါင်ဇာရ် ရီမ်းကီုင်းမိုဂူႈ ကဒါႇလေႈဆာင်ငည်း ဂေါႇပ္လေပ်ုန်ဒေဲႈကဲဒီန် အာဝ်တိူဝ်လစိဆေအောႏ။
တံပ်ကညာအာဏာဆီုက်ဇေဝ်ကဲနီန် ကဲႎီရ်ဘိူန်းဘိုး ထိင်ခြဲခေဲင်ကီုင်းမိုဂူႈ တောပ်ပ်ုန်ကဇောည်ဒဲႈခယ် ဆာ်မိုႈနှာရိူဝ်ႇကီုင်း မိုႈတံပ်လံပ်တီုက်ႎှီုန်း PDF ကဲအီထိင်ခြဲအူန်းအောႏ။
ကဇေန်နီး တိုအီးခေဲင်ကီုင်းမိုဂူႈကဲ ဘ်ုပ်ဒဝ်ႎဲႈဖါ်ႈ ကဒါႇဂီုန်း တိုအီးခေဲင်အရာပ်ကဲ က္လာင်းဒါႈ ဆာ်တံပ်ကညာအာဏာဆီုက်ဇေဝ်ကဲ ထိုးလေႈနှာရိူဝ်ႇကီုင်း အ်ုန်နံင်ဆမာပဲန်ဟာဝ်းဘိုး ပ္လေါည်ကတီုက်ကပဴင်အောႏ။
တံပ်ကညာအာဏာဆီုက်ဇေဝ်ကဲနီန် ကဲလီပ်ဒေဲႈဖါ်ႈ ခေဲင်ကီုင်းမိုဂူႈကာည်း ခေဲင်ကီုင်းမိူင်းမီတ် ဂါရ်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း – TNLA နီန် ခည်ကျံရ်နိုႎဲမ်ဘာ ဆငည်း 29ကာည်း ဆငည်း 30ဒိူန် တောပ်ပ်ုန်လီပ်ကဇောည်ဒဲႈခယ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
