ယာရူစိင်၊ ကျံရ်အောဂ်ုတ် ဆငည်း 26၊ မိုဂူႈ
ကောန်အီမာည်း ကဝ်အီမိုႈတိုအီးခေဲင်အရာပ်နီန်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈပ္လေ ပကီုင်းမိုဂူႈ ကဒါႇလေႈဆာင်ငည်း အ်ုန်အီမိုႈ ဒီပ်ုန်ထိင်ခြဲအူန်း PSLF/TNLA ကဲအောႏ။
ကဲဒါႈမိုႈ တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းပ္လေဘျုင် ပရီမ်းကျောင်ဆင်တောင် အ်ုန်အီဂေါည်ပဇံင် စည်ပင်သာယာ ခေဲင်ကီုင်းမိုဂူႈ ကဒါႇလေႈဆာင်ငည်းနီန် ခည်ကျံရ်အောဂ်ုတ် ဆငည်း 25 ခိင်မှိူဝ် 11နြီဒိူန်အောႏ။
ကောန်အီမာည်း ခေဲင်အရာပ်ဒီန်အူအီး က္လာင်းဒါႈ “ဆာ်မိုႈကဇေန်နီး ယိူဝ်းကဲဒါႈမိုႈ ရီမ်းကျောင်ဆင်တောင်။ ဘည်တိူဝ်ဘာတ်ကဲနီန်မာ် မိူဝ်ႈအေ့။ ညှံမ်ဘိူန်းစိနံပ်ကတီးကရီး။ အ်ုန်မိုႈဇံင် ဒီဂေါည်ဂေါ်ရခါးကဲ”
တောပ်အီကဆီုဝ်ကဆဲင် ဘည်ပျောႈဟာဝ်းကဲ တပ္လေဘျုင်နီန် ဖုင်ယဲဆျှိုည်ဖီမျေ ဆီုင်ဒါ့်ဆီုပ်တခေါရ်အူန်းအောႏ။
ဆဲႈဒါႈဒီန် ခည်ကျံရ်အောဂ်ုတ် ဆငည်း 25 ခိင်ညှာ ကပံတ် 11နြီလေႈအူကဒည်ဒိူန် ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဟာဝ်း ပေါင် 250 ပရီမ်းကျောင်ဝါဆို ပိန္နဲကုန်း ခေဲင်ကီုင်းမာဝ်းႎံင်းနီန် 2ပိုင်း စီပဲန်တိူဝ်ဘာတ်ဖါ်ႈချှရိုကဲ 3ပါး လလူလေဲဝ်ဟာဝ်း ဂါင်ဂေါည် 20ကြောင်အောႏ။
စူန်မှိူဝ်ဒိူန်မာ် ခေဲင်ကီုင်းမိူင်မီတ်နီန် ဘိူည်ကတူႈအီဒေဲႈပျောႈဟာဝ်း ပ္လေဘျုင်မာ် ညှံမ်နံပ်စိ ဘည်တိူဝ်လလူလေဲဝ်ဟာဝ်းကဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
