မာည်းရူပ၊ ကျံရ်အံက်တိုဘာ ဆငည်း 13၊ မိုဂူႈ
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ဒေဲႈပျောႈဟာဝ်းပ္လေဘျုင် ပရဝ်လယ်ကြီးကာည်း ပစီး လှံင်မိုဂူႈ ကပီုန်ဒါင်းမာန်းတလေး အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲနီန် 3ပိုင်းအောႏ။
ခည်ကျံရ်အံက်တိုဘာ ဆငည်း 12 စူန်မှိူဝ် ကပံတ် 5နြီလေႈ 10မနေတ်ဒိူန် တံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေ ရီမ်းရဝ်လယ်ကြီးနီန် 1ပိုင်းကာည်း ခေဲင်ရဝ်ပစီးကဲ 2ပိုင်းအောႏ။
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ဆာ်မိုႈရဝ်လယ်ကြီး အာဝ်ဇောႈစိခေဲင်ရဝ်။ အ်ုန်ဇောႈလိူည်ခေဲင်ဘြည်။ ဆာ်မိုႈပပစီး ဂါင်ဂေါည်လူလေဲဝ်ဟာဝ်း 2ကြောင်။ ခိင်ဒီန်ငျားကညာဂါင် ဟာဝ်းခေဲင်ဂီုင် စီပဲန်အ်ုန်လောတ်”
ခည်ကျံရ်အံက်တိုဘာ ဆငည်း 11ဒိူန်မာ် ဂေါႇမိုႈတံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေ ခေဲင်ရဝ်ကဒေါဆံင်း လှံင်မာဝ်းႎံင်း အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်းကဲ စီပဲန်လဘာတ်ဖါ်ႈ ကောန်ကညောမ်အူအီး ဂါင်ဂေါည်လူလေဲဝ်ဟာဝ်းပွံတ် 2ကြောင်အောႏ။
ဇူႈပွံတ်ကျံရ်အံက်တိုဘာ ဆငည်း 1ဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ပျောႈကစံပ်ဖါ်ႈ ပ္လေဘျုင် ပဆဘော၊ အိုမ်ငျံရ်၊ အိုမ်ယ်ုရ်၊ မာဝ်းႎံင်း၊ မိုဂူႈကာည်း ရူကောကဲနီန် တောန်ဆငည်းအောႏ။
ဂေါႇပ္လေဘျုင် ပ်ုန်ပျောႈဟာဝ်း တံပ်ကညာအာဏာဆီုက်ဇေဝ်ကဲ ခေဲင်ဘြည် 2နှားနီန် တောပ်ဘည်စြာင်းပ်ုန်ကစုအူန်း ဖုင်ယဲဆျှိုည်ဖီမျေ တောပ်ပည်ကောန်ကညောမ် 4အီး တိုအီးဟည်ယံမ်းဟာဝ်းဖါ်ႈ ခေဲင်အရာပ်တအာင်းနီန် 31အီး တောပ်ပည်ကောန်ကညောမ် 9အီး တိုအီးဘာတ်ဂေါည် 28အီးအောႏ။
ဆာ်မိုႈကဒါႇ တံပ်ကညာအာဏာဆီုက်ဇေဝ်ကဲ ကဲဒါဖါ်ႈ ဒရုင်၊ လာက်နာက်ဒါင်းကာည်း ယာန်ပ်ုရ် လူည်ႇဟာဝ်းဖါ်ႈ ပ်ုန်လူည်ဆီုက် တေဲင်ကူန်ရဝ်မာဂါင်ကဲ ကဆီုဝ်ကူန်ရဝ်မာဂါင်ကဲမာ် ဆာ်ႈဟိုရ်အူန်း ကနာည်နှာင်းအူန်းဆဒိဒါင်းဒါင်း တေဲင်လံပ်အရေးဆီုက်နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
