ကျံရ်အံက်တိုဘာ ဆငည်း 10
ဖုင်ယဲဆျှိုည်ဖီမျေတခေါရ်နံပ် မိုႈတ ခိင်ဟောည်ႇပျောႈ တံပ်ကညာအာဏာဆီုက်ဇေဝ်ကဲတ ပ္လေဘျုင် ခေဲင်ကီုင်းကုင်ငှေါနီန် ခည်ကျံရ်အံက်တိုဘာ ဆငည်း 8ဒိူန် ကဲပျောႈဟာဝ်းဘိုး ပရဝ်နမ့်မန်း အ်ုန်အီဂေါည်တောပ်ဒေင် မာဝ်းႎံင်းကာည်း ကုင်ငှေါနီန် အ်ုန်တိူဝ်လဖါ်ႈ ကပုနံမ့်မန်း ဆာ်မိုႈတိုအီး အ်ုန်အာဝ်လစိအောႏ။
ကဝ်အီဂေါည်ကဒံတ်ရဝ် နမ့်မန်းနီန်အူအီး က္လာင်းဒါႈ “အ်ုန်ခ္လေါႈဟာဝ်းဒျဲမ်လိူည် တေဲင်ရဝ်နီန်။ ကတီုင်မိုႈ ကဲနံင်ပျောႈဟာဝ်း ခေဲင်ရဝ် ကဲစီခ္လေါႈဖါ်ႈ ဟာဝ်းပျောႈ။ ဟောည်ႇဒီန် စီနံပ်မိုႈတ ခေဲင်ရဝ်နမ့်မန်း”
ကပုဒီန် အ်ုန်မိုႈကပု ပ်ုန်တိူမ်ပ်ုန်လူလေဲဝ်ဟာဝ်း တံပ်ကညာအာဏာဆီုက်ဇေဝ်ကဲ ခိင်တံပ်ဆီုက်တအာင်းကဲ တီုက်ယာႈကီုင်းမာဝ်းႎံင်းနီန် ခည်လံပ်တီုက်နာန်း 1027 ဒေါန်အာရ်ဒိူန်အောႏ။
ကဇေန်နီး ခနားတံပ်ကညာအာဏာဆီုက်ဇေဝ်ကဲကာည်း တံပ်ဆီုက်တအာင်းကဲ ဆီုပ်ပဲန်ဖါ်ႈ ပ္လေါည်ကတီုက်ကပဴင် ရီမ်းကီုင်းမာဝ်းႎံင်း ကဒါႇဒေင်ဟာဝ်း ဆဘောမာ် ပ္လေါည်ကတီုက်ကပဴင် ဆီုင်ဒါ့်ရဲင်အူန်းအောႏ။
ခိင်ထိုးလီပ်ကဲ ကဒါႇဆဘောနီန် တံပ်ကညာအာဏာဆီုက်ဇေဝ်ကဲ ဂီုည်ပျောႈဟာဝ်းဖါ်ႈ ပ္လေဘျုင် ခေဲင်လှံင်ပ်ုန်ထိင်ခြဲအူန်း တံပ်ဆီုက်တအာင်း ခည်ဂီုန်း ဂေါႇဘည်ပျောႈဟာဝ်းကဒီန် တိုအီးခေဲင်အရာပ်ကဲ ဟည်ယံမ်းဟာဝ်း 20အီး အာဝ်ယောမ်အောႏ။
ခိင်ပဲန်ပ္လေါည်ကတီုက်ကပဴင် ဂေါႇမိုႈတံပ်ကညာအာဏာဆီုက်ဇေဝ်ကဲ ဆမာဆီုပ်ပျောႈဟာဝ်း ပ္လေဘျုင် ခေဲင်ရဝ်ကာည်း ခေဲင်ကီုင်း ကဲအီအာဝ်ကဆဲင်တောပ် ပ္လေါည်ကတီုက်ကပဴင် စီပဲန်ကဒါႇတံပ်ဆီုက်တအာင်းကဲ ဆာ်ႈဟိုရ်ပ္လူႈအူန်းဆဒိ ကနာည်နှာင်းတောပ်ဒါ ရဒေင်ဒံန်ခြဲ ဖေးရာန်ယာန်ပ်ုရ်နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
