ယာရူစိင်၊ ကျံရ်ဆဲပ်တီမ်ဘာ ဆငည်း 3၊ ဆဘော
ကောန်အီမာည်းအူအီး က္လာင်းတဆျှိုည်ဖီမျေဒါႈ ဂေါႇမိုႈတံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းပ္လေ ပရဝ်ဘော်ကြို လှံင်ဆဘော ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲ စီပဲန်လဘာတ်ဟာဝ်း ကောန်အီမာည်း 1အီးအောႏ။
အဒိူဝ်ကျံရ်ဆဲပ်တီမ်ဘာ ဆငည်း 3 ခိင်ဆံန်ကပံတ် 2နြီဒိူန် ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဟာဝ်း ပ္လေဘျုင် 2ပိုင်း ဆဲႈဒါႇတိူဝ်ဘာတ် ကောန်အီမာည်း 1အီး အ်ုန်လလူလေဲဝ်ဟာဝ်းဘိုး ဂါင်ဂေါည် 2ကြောင်ေအောႏ။
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ “ကဲဒေဲႈပျောႈ ခေဲင်ရဝ်ဘော်ကြိုယာ့်။ ကဝ်အီဘာတ်ဒီန်မိုႈ လတည်းအ်ုန်။ အာဝ်ကဆဝ်းစိထာန်မှော။ ဆာ်မိုႈပ္လေဘျုင် 1ပိုင်း အ်ုန်ဇောႈကဆီုဝ်ပွံတ် တေဲင်ဂါင်ယာ့်”
ခည်ကျံရ်အောဂ်ုတ် ဆငည်း 18 ခိင်ညှာ ကပံတ် 9နြီလေႈအူကဒည်ဒိူန်မာ် ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဟာဝ်း ပေါင် 500 ပဇံင်တောင်မြို့ကာည်း ဇံင်ကဒါႇလီပ်ဆာင်ငည်းနီန် 2ပိုင်း စီပဲန်လလူလေဲဝ်ဟာဝ်း ဂါင်ဂေါည် 9ပိုင်းအောႏ။
ဆဲႈဒါႇဒီန် ဇူႈပွံတ်ကျံရ်ဇူန်လည် ဆငည်း 4ဒိူန် ရောတ်ဘံင်ကျံရ်ဆဲပ်တီမ်ဘာ ဆငည်း 3နီန် တံပ်ကညာအဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဟာဝ်းပ္လေ ပကီုင်းဆဘောနီန် ဟည်မိုႈ 9လိူဝ်ႈယာ့်အောႏ။
ဘာည်းလိူည်ဒီန် ဇူႈပွံတ်ကျံရ်အောဂ်ုတ် ဆငည်း 1 ရောတ်ဘံင် ဆငည်း 30 ခေဲင်အူကျံရ်နီန်မာ် ဂေါႇဖေးရာန်ယာန်ပ်ုရ်ကာည်း ဂေါႇလာက်နာက်ဒါင်းပ်ုန်ပဴင်ကဲ တောပ်ပည်ကောန်ကညောမ် ခေဲင်အရာပ်ပ်ုန်ထိင်ခြဲအူန်း တံပ်ဆီုက်တအာင်း TNLAကဲ5အီး တိုအီးရဝ် ဟည်ယံမ်းဟာဝ်း 57အီး ဘာတ် 66အီးအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
