မာည်းရူပ၊ ကျံရ်ဇူန် ဆငည်း 10၊ ရူကော
တိုအီးရဝ်မိူင်ဘော်ကဲ က္လာင်းတဖုင်ဆျှိုည်ဖီမျေကဲဒါႈ ပအရာပ်တအာင်း လှံင်ရူကော မိူင်ဘော်(ရဝ်နမ့်ဟိုင်း)နီန် ကောန်ဆီုက် တံပ်ဆီုက်တအာင်း TNLA ကဲအူအီး ကတူႈအီပဴင် ယံမ်းဟာဝ်းအ်ုန်အောႏ။
ကောန်ဆီုက် TNLA နီန် ခိင်ဘအ်ုန်တဆဲင်ကယ် ဟာဝ်းကဒါႇမိူင်ဘော် ကာည်း ဒေင်ကကာ်ႈမိုနွဲ့နီန် အ်ုန်ကတူႈအီပဴင်ဟာဝ်းအ်ုန်တေဲင်ဒေင် ခည်ကျံရ်ဇူန် ဆငည်း 8 စူန်အံပ် ကပံတ် 7 နြီဒိူန်အောႏ။
ကဝ်အီနံပ် ဘည်မိုႈဘည်ဘာည်း တိုအီးအရာပ်မိူင်ဘော်ကဲ အူအီးက္လာင်း တဖုင်ဆျှိုည်ဖီမျေဒါႈ “ အ်ုန်ငျားအီပဴင်အ်ုန် ပဒေင်မိူင်ဘော် ကာည်း မိုနွဲ့။ အာည်ႇလည်လေႈဟာဝ်းအ်ုန် ယိူဝ်းကဲဒါႈ ကဲပဲန်ကအေဲႈအထဲင် ခေဲင်ဆဲင်ပ်ုန်ဟောမ် ပမိူင်ဘော်။ မိုႈလိူည် ညှံမ်နံပ်စိ ကဝ်အီလူည်ႇအမှု အီပဴင်ဟာဝ်းအ်ုန်ဒီန်”
အယ်က်ုန်တိူရ်ႈ ဘည်ရူပ်ရာင်ပ်ုန်တိုန်းဒေဲႈကဲတ ဖုင်ဆျှိုည်ဖီမျေနီန် ကောန်ဆီုက်ဒီန် အ်ုန်ကတူႈအီပဴင်ကိင်အ်ုန် ဆဲႈဒီန် ရီမ်းပြောတိုပိုင်းခန္ဓာယံမ်းအ်ုန်မာ် ယိူဝ်းဘိုး ဂါင်ပ္လေဆနာတ် အာရ်ပိုင်းအောႏ။
ကောန်ဆီုက် TNLA ကဝ်အီကတူႈပဴင်ဒီန် အ်ုန်ဇီုဝ်မာည်းယည်အီင် ကံပ်ရောတ်ကဇေန်နီး ကဲညှံမ်ဘိူန်းစိတိုည်းဟာဝ်း ကဝ်အီလူည်ႇဒီန် ကဒါႇဖုင်ပလိက်တအာင်း PSLF/TNLA ကဲမာ် ဂီုည်ဆီုပ်တခေါရ်အောႏ။
ကဒါႇရဝ်မိူင်ဘော်ဒီန် တံပ်ဆီုက်တအာင်း TNLA ကာည်း တံပ်ဆီုက်ခါင် KIA ကဲမိုႈ အီဟာဝ်းႎီရ် အီဂေါည်ကဒါႇရဝ်ဒီန်မိုႈ ခါင်၊ တအာင်း၊ ဆျှံမ် ကာည်း ခယ်ကဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
