လိုည်းလာဝ်ဇာရ်၊ ကျံရ်အောဂ်ုတ် ဆငည်း 27၊ အေဲမ်ကိုက်
ကဝ်အီကဒံတ်တောပ် ဘဝ်ရမာအ်ုန်ကဲအူအီး က္လာင်းတဆျှိုည်ဖီမျေဒါႈ ဘံန်ဟောည်ႇတိုည်းဟာဝ်း တံပ်ဆီုက်ခါင် KIA ကဲ တကောန်အီမာည်းအူအီး အ်ုန်အီဂေါည်ပဇံင် 2 ကီုင်းအေဲမ်ကိုက် ကပီုန်ဆျှံမ်ကဒါႇပိူည် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း TNLA ကဲနီန် ဘံန်ဟောည်ႇလှေင်ဘြည် 5ဆငည်း အ်ုန်ဟည်ယံမ်းဟာဝ်းအောႏ။
ခည်ကျံရ်အောဂ်ုတ် ဆငည်း 19 စူန်မှိူဝ်ဒိူန် KIA ကဲ တိုည်းဟာဝ်းဖါ်ႈ တာမော်င်မော်င် ဘိူန်းအဆာက် 35ဆန်ုမ်နီန် စူန်မှိူဝ်ကျံရ်အောဂ်ုတ် ဆငည်း 23ဒိူန် ကဲစီဒေဲႈပ္လူႈ တဘဝ်ရမာကဲဒါႈ အ်ုန်ဟည်ယံမ်းဟာဝ်း ပကဘေဲမ် တီုင်တံပ် 9 KIA ကဲယာ့်အောႏ။
ကဝ်အီကဒံတ်တောပ် ဘဝ်ရမာအ်ုန်ကဲအူအီး က္လာင်းဒါႈ “မှိူဝ်ဒီန် ဖုင်လံပ်တီုက်ယာႈ ခံင်မဝ်းကဲနီန် တတာဘြောင်ဇံင်ကဲမာ် ကဲအာဝ်ပ္လူႈစိဆဒိ။ ကဲလီပ်ဒေဲႈဖါ်ႈခေဲင်ဇံင် စီတိုည်းဟာဝ်း။ ကဲက္လာင်းဟာဝ်းအေ့ တဆူအ်ုန်ဒါႈ ယဲဟည်တိုည်းဟာဝ်း မော်င်မော်င်။ နံမ်ဘာတ်ႎှုင်ကဲမာ် ကဲမှာန်းဟာဝ်းအေ့။ ကံပ်ဂေါည်အူဆငည်း အာရ်ဆငည်းမာ် ကဲအာဝ်ကတူည်ႇဒေဲႈစိ။ ဘံန်ဟောည်ႇယံမ်းအ်ုန် ကဲစီဒေဲႈက္လာင်း”
ဆာ်မိုႈတိုပိုင်းခန္ဓာယံမ်း တာမော်င်မော်င်ဒီန်မိုႈ ဘဝ်ရမာအ်ုန်ကဲကာည်း ကူန်ရဝ်မာဂါင်ကဲ၊ ဉက္ကဌ ထုင်မှိူမ်ကာည်း ဘေဲႇဘာန်းလှံင်၊ ဖုင်ပလိက်တအာင်းကဲကာည်း ခူန်လံပ်ဘြောင်ချှာင်ကဲ အီဟာဝ်းတိူဝ်ႈဖါ်ႈ စီတိုည်းဒေဲႈ တရင်ခွဲရုံ ကီုင်းအေဲမ်ကိုက်အောႏ။
အ်ုန်ဆီုပ်က္လာင်းဒါႈဘိုး “တောပ်ဘည်စေတ်မေန်း တာဆြာႎူန်ကဲဒါႈ ကဲယိူဝ်းဘံန်းဂါ်ႈႎံင်း တကဒူႇအ်ုန်ကာည်း တတည်းအ်ုန်အာရ်ကဒါႇ။ တႎဲ့အ်ုန်မာ် ယိူဝ်းအေ့နှာမ်းရွည်ႇ။ တတိုအ်ုန်မာ် ယိူဝ်းအေ့ဘံန်းအီုင်ဂ္လီႇ။ အီနီန်မိုႈ တောပ်ဘည်ပ်ုန်စေတ်မေန်းကဲဒီးကော်။ နံင်ဆမာမိုႈစံမ် အ်ုန်ယံမ်းဟာဝ်း ဂေါႇဖေးတာမ် နှာမ်းတဟူရ်ဟျာ့်အ်ုန်ဒီန်ယာ့်”
ကဝ်အီကဒံတ်တောပ် ဘဝ်ရမာအ်ုန်ကဲအူအီး က္လာင်းဒါႈ တောပ်ဘည်က္လာင်း တာမ်တားအိူင် KIA ကဲဒါႈ ခည်ကျံရ်အောဂ်ုတ် ဆငည်း 23ဒိူန် ခိင်ကာႈဒဲႈကဲ တႎံရ်ဇိူင် ကနာည်နံင်ဒါကဲတအိုမ် ဂေါႇမိုႈတာမော်င်မော်င်ဒီန်ဒဝ်း စီပဲန်ခိင်ႎီရ်ဘိူန်းကဲတတိုည်းအ်ုန် ဘာည်းလိူည်ဒဲႈတာမ် စီဒဲႈအ်ုန်ဇံင်းဘြည် အာရ်နြီ ဂေါႇမိုႈအ်ုန်အာဝ်ဘယ်ဒေဇံင်း စီပဲန်နူန်းအ်ုန်ဒေဲႈဖါ်ႈ ယံမ်းဟာဝ်းအောႏ။
တာမ်တားအိူင်ကဲ မှာန်းအူန်းဘဝ်ရမာအ်ုန်ကဲ ပ္လိူတ်ႎါင်းခွါင်းဒဲႈ တေဲင်ဘည်အာဝ်ကကာမ်းလာ်ဒါ ယံမ်းဟာဝ်းဘည်နီန်နီးအောႏ။
ကဝ်အီကဒံတ်တောပ် ဘဝ်ရမာအ်ုန်ကဲအူအီး က္လာင်းဒါႈ “ဘည်က္လာင်းလေႈကဲမာ် အာဝ်ကနှေရ်စိ။ ဆာ်မိုႈတာမ်တားအိူင်စီဒါႈ ကနာည်နှာင်းကဲရဘံန်းဒီန်အာဝ်ဘာည်း မဲႈဒီန်ယဲမဲႈအေ့။ ဆာ်မိုႈပွံတ် မောကံပ်ယံမ်းဒီန် ယဲအာဝ်မဲႈစိ။ ခံင်မိုႈအ်ုန်အာဝ်ဟောမ်ပေါမ် ဟည်ဘိူန်းဘြည် 4ဆငည်း နံင်ဆမာမိုႈ အ်ုန်ယံမ်းဟာဝ်း ဂေါႇအာဝ်မိူဝ်ႈအဟာရ။ ဆာ်မိုႈတားအိူင် စီဒါႈ ခိင်ဘိူန်းယဲတတိုည်းအ်ုန်ဒီန် ယဲခံတ်အူန်းရခံတ်တည်း။ အ်ုန်ဒါႈ ကဲတုအူန်းအ်ုန် တရံင်ဒီန် ပါ်ဆငည်း။ အီဒီန်ယာ့် အီအာဝ်ကငျား”
တောပ်ပ်ုန်ကဆီုဝ်ကဆဲင် ဘည်ယံမ်းဟာဝ်း တာမော်င်မော်င်နီန် KIA ကဲကာည်း ဘဝ်ရမာအ်ုန်ကဲ ဆီုင်ဒါ့်ဆီုပ်ကမိုန်ဟာဝ်းအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
