ပိုႈလဘား၊ ကျံရ်ဆဲပ်တဲမ်ဘာ ဆငည်း 22၊ အေဲမ်ကိုက်
ကဝ်အီနံပ်ဘည်မိုႈဘည်ဘာည်း ကောန်အီပ်ုန်အူအီး က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ဆီုက်တအာင်း ကဲတထိင်ခြဲ ခေဲင်ကပီုန်ဆျှံမ်ကဒါႇပိူည် ပလှံင်အေဲမ်ကိုက် ပဂါင်ဆနံမ်နီန်အူလှေ တာဆြာခေါခါႇအူအီး လီလာနဘာည်းဟာဝ်းတ ကောန်အီပ်ုန်ဒဲႇ အ်ုန်အီဘိူန်း အဆာက် 14 ဆန်ုမ်နီန် ဂည်လိူဝ်ႈဂည်လိူဝ်ႈအောႏ။
ဂါင်ဆနံမ် ရွှေကွတ်ခိုင် အ်ုန်အီႎိူဝ်ႈအူန်း ခေဲင်ဇံင် 8 နီန် တာဆြာခေါခါႇ ဒေါက်တာ အောင်ဖြိုးနိုင် အ်ုန်အိီဘိူန်း အဆာက်ကပံတ် 37 ဆန်ုမ်နီန် လီလာနဘာည်းဟာဝ်းတ ကောန်အီပ်ုန်ကဝ်အီရေဲန်ဇီုင်းကာန်ခေဲင်ဒီန် ဂည်လိူဝ်ႈဂည်လိူဝ်ႈအောႏ။
ကဝ်အီနံပ် ဘည်မိုႈဘည်ဘာည်း ကောန်အီပ်ုန်အူအီး က္လာင်းဒါႈ ခည်ကျံရ်ဆဲပ်တဲမ်ဘာ ဆငည်း 16 ဘံန်ဆံန် ကပံတ် 1 နြီဒိူန် တာဆြာဒီန် လီလာနဘာည်းဟာဝ်းတ ကောန်အီပ်ုန်ဒဲႇဒီန်အောႏ။
“ လိူဝ်ႈအူဒိူန် ခိင်ဂေါည်ကောန်အီပ်ုန်ဒီန်အူအီး တာဆြာကဲ ဆူည်ႇဖါ်ႈအ်ုန်ႎိူဝ်ႈပလိုႈစီ ဒေဲႈတိူဝ်ႈဂြို။ ကောန်အီပ်ုန်စီဒါႈ တာဆြာဆေနံင်လိုတိူဝ်ႈ အ်ုန်စီပဂေႈဖါ်ႈ ကောန်အီပ်ုန်ဒီန်စီ လီလာနဘာည်းဟာဝ်းလာ်။ စီဒါႈဘိုး အာဝ်ဘိူန်းက္လာင်းတအီး ဆာ်မည်က္လာင်းမာ် နံင်မိုႈလိူည်မာည်း နံင်ကတူႈဆာည်း။ ခေဲင်ကျံရ်နီန်မာ် အ်ုန်ရီန်းဒေနဘာည်းတ ကောန်အီပ်ုန်ဒီန် မိုႈလိူည်အ်ုန်စီ ရီန်းဒေလောတ်ဒဝ်”
ကဲဒါႈ ကောန်အီပ်ုန်ဒဲႇဒီန် ကတူႈတာဆြာဒီန် လီလာနဘာည်းတအ်ုန် ခည်ကျံရ်မတ်ဒိူန် 2 လိူဝ်ႈ၊ ခေဲင်ကျံရ်ဇူန်ဒိူန် အူလိူဝ်ႈ ကာည်း ခေဲင်ကျံရ်ဇူန်လည်ဒိူန် 1 လိူဝ်ႈ ကပျောဒါႈဘိုး အာဝ်ဘိူန်းက္လာင်းတအီးအောႏ။
ကောန်အီပ်ုန်ကဝ်အီ က္လာင်းရႎိုည်နီန် ဆီုပ်ဒါႈဘိုး ကဇေန်နီး ကောန်အီပ်ုန်ဒဲႇဒီန် ဟည်ရောတ်ယာ့်ဒီလောတ်ဖေး ဌာနအီကဆီုဝ်ကဆဲင်ကဲမာ် ဟည်စေတ်မေန်းဖါ်ႈတာဆြာဒီန်စီ တိုည်းဟာဝ်းဟောည်ႇအ်ုန်အောႏ။
“ ဆိင်ဒဲႈကဲဘိဂါင်ဆနံမ် ပ်ုန်ႎိူဝ်ႈအူန်းအ်ုန်။ ကဇေန်နီး ကဲညှံမ်ဘိစိ။ ကောန်အီပ်ုန်ဒဲႇဒီန်မာ် ဟည်က္လာင်းတ ပလိက်ကဲ ကနာည်နံင်ဒဲႈအ်ုန်ဇောႈကဘေဲမ်။ မာကောန်အီပ်ုန်ဒီန်စီ နှေရ်လိူည်အာဝ်ဆိင်ဒဲႈအ်ုန်ဇောႈကဘေဲမ်။ ဒါႈဘိုး က်ုန်ဒဲႈအ်ုန်ဇောႈကဘေဲမ်မာ် ကဲမိူဝ်ႈရိူန်း နံင်ဂီုည်လောတ်လေႈလိူည်။ ဆေကဲဂီုည်ဒါႈအူန်း တမာအ်ုန်မာ် အာဝ်နံပ်ဒီႈဂောာ်။ အ်ုန်ရောတ်ပဂါင်ဆနံမ်ဒီန် မာအ်ုန်မာ်ခံင်မိုႈကညာညှာ နှေရ်လိူည်ဆိင်ဘိူန်းရိူန်း”
ကောန်အီပ်ုန်ဒဲႇဒီန်မိုႈ ခေဲင်ခမိုအင်းမိန်းဟိုကျန့် အ်ုန်ဇူႈလီပ်ခေဲင်ဂါင်ဆနံမ်ဒီန် ခည်ကျံရ်နိုႎဲမ်ဘာ ဆငည်း 16 ခည်ဆန်ုမ် 2024 ဒိူန် ရူရ်ႈကျံရ်အ်ုန်မိုႈ အူကျံရ် 2 ဆဲန်လေႈ 5 မှီုန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
