လိုည်းဇူန်မိုး၊ ကျံရ်ဆဲပ်တဲမ်ဘာ ဆငည်း 13၊အေဲမ်ခြီရ်
ဘိူန်းအယ်နံပ် ဒီဘိူန်း တံပ်ဆီုက်တအာင်း PSLF/TNLA ကဲတထိင်ခြဲ ပကီုင်းအေဲမ်ခြီရ် ခေဲင်ကနံဝ်း 1 ဇံင်းကောင်းတပ်နီန် ႎံရ်ဝါယာနီန်ပဲန်ဖါ်ႈဆျှော့ ငံရ်ကဆူမ်းဟာဝ်းအောႏ။
ကဝ်အီနံပ်ဘည်မိုႈဘည်ဘာည်း ကောန်အီမာည်းအူအီး က္လာင်းဒါႈ အမှိူဝ် ကျံရ်ဆဲပ်တဲမ်ဘာ ဆငည်း 12 ခီညှာကပံတ် 11 နြီလေႈ 30 မနေတ်ဒိူန် အ်ုန်ဇူႈကဆူမ်းဟာဝ်းဖါ်ႈ စီဒါကား 7 ကြောင်နီန်ပျံတ်ဖါ်ႈ ဘံန်ရောတ် 12 နြီနီန် စီပျံတ် ဟောည်ႇဟာဝ်းလာ် ငံရ်ဒီန်အောႏ။
“ အမှိူဝ်ဒိူန် ငံရ်အာဝ်ဒေဲႈဒီ ကဲစီႎှိုဝ်ႈအူန်းငံရ်ဘည်ဒီန်။ ဘံန်ရောတ်ခီညှာ 8 နြီလေႈ 30 မနေတ်ဒိူန် ငံရ်စီႎီရ်ဒေဲႈ။ ငံရ်အ်ုန်ဒေဲႈလှာ်ဒီႈ ကဲစီႎှိုဝ်ႈအူန်းဘည်ဒီန် အ်ုန်မာ်ပဲန်ပွံတ်ဆျှော့”။
ကောန်အီမာည်း ကဝ်အီဒါႈ ရကႎိီုည်နီန်ဆီုပ်ဒါႈဘိုး ထာန်ဒိုင်း 24 ပေ ထာန်ဇာရ် 18 အ်ုန်အီမိုႈ ဂါင်ဒီဂေါည်ကောန်ကျောင်ကဲ အာရ်ထာပ်နီန် ကဆူမ်းဟာဝ်းဖါ်ႈ ကစုကပိုမ်အ်ုန် နံင်ချူမ်ဟာဝ်း ကပံတ် 100 ဆဲန်အောႏ။
ကဲဒါႈ ခေဲင်အဆောင်ဒီန် ကောန်ကျောင်ကဲအီဂေါည် နံင်မိုႈကပံတ် 100 လေႈ ဂေါႇမိုႈငျား ခိင်ပနောကောန်ကျောင်ကဲတဘေဲႇနီန် စီအာဝ်မိူဝ်ႈတိုအီးဘာတ်အောႏ။
ဘာည်းလိူည်ဒီန် ခည်ကျံရ်ဆဲပ်တဲမ်ဘာ ဆငည်း 4 ဘံန်ဆံန် ကပံတ် 1 နြီဒိူန် ပရဝ် 12 မဲင်ကုန်း အ်ုန်အီဂေါည် ခနားအေဲမ်ခြီရ် ကာည်း နမ့်ဖက်ကာနီန် ကားတာဂြိုအူကြောင်နီန် ကပ္လဖါ်ႈ ငံရ်ကဆူမ်းဟာဝ်း ဂါင် 2 ကြောင် ကာည်း ကားအူကြောင်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
