လိုည်းထိုည်း၊ ကျံရ်ဇံန်နႎရီ ဆငည်း 19၊ နမ့်စန်
ဖုင်အီပျံတ်ငံရ်(လွိုင်လင်) ကုင်ကပိုမ်ဘြာန် ကဲပ္လိူရ်ႈလေႈဒါႈ ကပီုန်ဆျှံမ်ကဒါႇက်ြုမ် ခေဲင်လှံင်နမ့်စန် တေင်ဒေင်လွိုင်လင် ကာည်း နမ့်စန်နီန် ကားတာင်တိုအီလေႈဒေင်ကဲအူကြောင် ဇောႈဟာဝ်းဖါ်ႈ တေင်ရအာင်း တိုအီးလေႈဒေင် ကောန်အီမာည်း 1 အီးယံမ်းဖါ်ႈ 9 အီးကတူႈဖေးဘာတ်ဟာဝ်းအောႏ။
ခည်ကျံရ်ဇံန်နႎရီ ဆငည်း 17 ခီညှာ ကပံတ် 10 နြီဒိူန် ရီမ်းပြောမိုင်တိုင် 177/1 အ်ုန်အီဂေါည်တေင်ဒေင်ဒါင်း လွိုင်လင် ကာည်း နမ့်စန်နီန် ကားအံစာတုံး အ်ုန်အီတာင်ဒေင်တိုအီးလေႈဒေင်ကဲ 11 အီးဂေါႇမိုႈ အာဝ်ဘယ်ဒေထိင်ဘ္လောမ်အ်ုန်နီန် ဇောႈဟာဝ်းဖါ်ႈတေင်ရအာင်းအောႏ။
ကညာကားအ်ုန်အီကောႈကားတေင်ဒေင်ဒီန်က္လာင်းဒါႈ “ ဒီအ်ုန်အီပဲန်ဟာဝ်းဒီန် ရီမ်းပြောဒီန် အ်ုန်ဂေါည်ဂေါည်ပဲန်။ အ်ုန်လိုအေ့ဆဒိဟောႇဒီဒီန်။ ပ်ုန်ယိူဝ်းအယ်တိူရ်ႈအရာင်ကဲဒီန်မာ် မိုႈဒိူည်ႇအီပဲန်နောႈအာဝ်ပျော”။
ကဲဒါႈ ကဲအီကတူႈဖေးဘာတ်မိုႈ ကောန်အီမာည်း 3 အီး ကာည်း ကောန်အီပ်ုန် 6 အီး အီဒေဲႈကဇောည်ကဲမိုႈ ဖုင်အီပျံတ်ငံရ် ကာည်း ဖုင်လံပ်ကဇောည်ကဲစီ တာင်တိုန်းလာ်ကဲ ပယုင်ဆနံမ်ဒါင်း လွိုင်လင်အောႏ။
တိုအီးအရာပ်နမ့်စန် ကောန်အီပ်ုန်အူအီး က္လာင်းဒါႈ ကနာည်နံင်ပြောမ်ဟာဝ်း ယာန်ကဒူႈနီန် ကာည်း ကနာည်နံင်အာဝ်မိူဝ်ႈဖေးအန္တရာယ်နီန် ကညာကားအီလေႈဒေင်ကဲ လိုအေ့ဆဒိဒါကောႈကားနီန်အောႏ။
ခည်ဆန်ုမ် 2025 ခေဲင်ကျံရ်ဒီဆဲမ်ဘာဒိူန်မာ် တောပ်ဒေင်လွိုင်လင် ကာည်း နမ့်စန်နီန် ပဲန်ဟာဝ်းအမှု ကားကပ္လ ဂေါႇဘည်ဒီန် တိုအီးလေႈဒေင် 3 အီးကတူႈဖေးဘာတ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ)
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
