ပိုႈလဘား၊ ကျံရ်ဇူန်လည် ဆငည်း 14၊ မိုဂူႈ
တိုအီးကီုင်းမိုဂူႈကဲ အူအီးက္လာင်းဒါႈ ဂေါႇဘျုင်ပ်ုန်ဒေဲႈပျောႈဟာဝ်း တံပ်ကညာအာဏာဆီုက်ဇေဝ်ကဲ ဒီဘိူန်းတံပ်ဆီုက်တအာင်း PSLF /TNLA ကဲတထိင်ခြဲ ပကီုင်းမိုဂူႈ ကဒါႇလေႈဆာင်ငည်း ရီမ်းပန်းမထိပ်နီန် အမှိူဝ် ကျံရ်ဇူန်လည် ဆငည်း 13 ခီမှိူဝ် 10 နြီလေႈ 30 မနေတ်ဒိူန် တောပ်ပည် ကောန်ဒဲႇ 2 အီး 8 အီးကတူႈဖေးဘာတ်ဟာဝ်းအောႏ။
တိုအီးကီုင်း မိုဂူႈအူအီး က္လာင်းဒါႈ “ ကဲဒေဲႈပျောႈဟာဝ်း ပေါင် 200။ လကောန်ဒဲႇ 2 အီး။ အူအီး အ်ုန်ဘာတ်ဘြေ့လိူည်။ ဂါင်မာ် လူလှဲဝ်ႏဟာဝ်း 2 ကြောင်။ အူကြောင်အ်ုန်လလိူည် ရကႎိုည်အ်ုန်။ အူဂါင် အ်ုန်လဂီုန်းအေ့။ ကား 2 ကြောင်မာ် လူလှဲဝ်ႏဟာဝ်း”
ဂေါႇဘျုင်ပ်ုန်ပျောႈကဲဒီန် ကဲအီကတူႈဖေးဘာတ်မိုႈ အ်ုန်အီဘိူန်းအဆာက် 10 ဆန်ုမ် မဖူးဖူး ကာည်း မရှင်းသန့်၊ ကဝ်အီဇီုဝ် အိသွယ် ဘိူန်းအဆာက် 18 ဆန်ုမ်၊ ကဝ်အီဇီုဝ် ကိုဟန်နိုင်ဇော် ဘိူန်းအဆာက် 25 ဆန်ုမ်၊ ကဝ်အီဇီုဝ် ကိုလတ် ဘိူန်းအဆာက် 41 ဆန်ုမ်၊ ကဝ်အီဇီုဝ်ဒေါ်တင်အေး ဘိူန်းအဆာက် 51 ဆန်ုမ်၊ အ်ုန်အီဘိူန်း အဆာက် 53 ဆန်ုမ် ဒေါ်အေးမြင့် ကာည်း ကဝ်အီဘိူန်းအဆာက် 55 ဆန်ုမ် ဦမောလီနီန်အောႏ။
ဆဲႈဒီန် အမှိူဝ် ကျံရ်ဇူန်လည် ဆငည်း 13 ခီညှာ ကပံတ် 6 နြီဒိူန်မာ် ကဲဒေဲႈပျောႈဟာဝ်းဘျုင် ပမာဝ်းႎံင်း ကောန်အီပ်ုန်အူအီး ကတူႈဖေးဘာတ်ဟာဝ်းအောႏ။
ခည်ကျံရ်ဇူန်လည် ဆငည်း 9 ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းဘျုင် ပမိုဂူႈ ကဒါႇလေႈဆငည်း ပပန်းမထိမ်နီန် ကောန်ဒဲႇ 2 အီးယံမ်းဟာဝ်းဖါ်ႈ တောပ်ပည် ကောန်ဒဲႇ 2 အီး 8 အီးကတူႈဖေးဘာတ်ဟာဝ်းအောႏ။
တောပ်ဘည်စြာင်းပ်ုန်ဘိူန်းအူန်း ဖုင်ယဲဆျှိုည်ဖီမျေ ပအရာပ်ထိင်ခြဲ တံပ်ဆီုက်တအာင်းကဲ ပနောင်ခေဝ်၊ မာဝ်းႎံင်း၊ မိုးဂူႈ ကာည်း ဆဘောနီန် ခေဲင် 2 နှား ဂေါႇဘျုင်ပ်ုန်ပျောႈ တံပ်ကညာအာဏာဆီုက်ဇေဝ်ကဲ တိုအီးအရာပ်ကဲ ယံမ်းဟာဝ်း 15 အီး 45 အီး ကတူႈဖေးဘာတ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
