မာည်းအဆျှဴင်၊ ကျံရ်မေ ဆငည်း 21၊ မိုဂူႈ
ကဝ်အီကဒံတ်တောပ် TNLA နီန် က္လာင်းတဆျှိုည်ဖီမျေဒါႈ ဇိုချီုင်တိုည်းအူန်း တံပ်ဆီုက်တအာင်း – TNLA ကဲ တိုအီးဂေါည်ခေဲင်အရာပ်မိုဂူႈနီန် 2အီး ဟည်ယံမ်းဟာဝ်းအောႏ။
အ်ုန်ဒါႈ ကဲစွဲဖါ်ႈ ဒါႈမိုႈ ကိုကိုအောင် အ်ုန်အီဂေါည်ပကီုင်းမိုဂူႈ အီဂေါည်ကအူရ် ကပီုန်ဒါင်းမာန်းတလေးကာည်း ကပီုန်ဆျှံမ်ကဒါႇပိူည်နီန် ဒါခံင်မဝ်း စီတိုည်းအူန်းအ်ုန် အ်ုန်ကျံရ်မေ ဆငည်း 5ဒိူန်အောႏ။
“အူအီးပ်ုန်ထိူမ်ကဲလာ်ဒါ တိုည်းဟာဝ်းနီန် အ်ုန်မိုႈအီဒါဘိုန်းအူန်း ခံင်မဝ်း။ ခေဲင်တိုအ်ုန် ဟည်မိူဝ်ႈရောဂါ။ ဂေါႇဘည်ဒီန် တိုည်းအူန်းအ်ုန် ဆီုင်ဘိူန်းလိူည် 1မှိူဝ်။ ရောတ်ခိင်ညှာ ဘံန်မိုႈရောဂါအ်ုန်ဟည်ဒေဲႈ ခိင်ရဲန်ကနာည်နံင်တိုန်းအ်ုန်ပယုင်ဆနံမ်ဒါင်း အ်ုန်ဟည်ယံမ်းဟာဝ်းဖါ်ႈ တေဲင်ကားပလိက်ကဲ”
ဆဲႈဒါႇဒီန် ခည်ကျံရ်မေ ဆငည်း 8ဒိူန်မာ် TNLA ကဲဟည်တိုည်းဟာဝ်းဘိုး ကိုဇော်ဇော် တောပ်အမှုႎှီုန်းဂေါႇခံင်မဝ်း ဘံန်လှေင်ဒေဲႈ 3ဆငည်း ခည်ကျံရ်မေ ဆငည်း 11ဒိူန် အ်ုန်ဟည်ယံမ်းဟာဝ်းအောႏ။
ခိင်ကိက်ပ္လိူရ်ႈ တောပ်ပ်ုန်က္လာင်းတိုအီးခေဲင်အရာပ် တီုင်ဌာနပဲခေါင်ကဲ ဒါႈမိုႈ မိူဝ်ႈဘည်မဲႈ TNLA ကဲတ ကိုဇော်ဇော်ဒီန် ကဝ်အီနံပ်ဘည်မိုႈဘည်ဘာည်း ဂေါည်ကဒံတ်တောပ် TNLA ကဲအူအီး စီက္လာင်းတဆျှိုည်ဖီမျေဒါႈ ဂေါႇမိုႈတိုည်းအူန်း ခိင်မဝ်းကဆဝ်းအ်ုန်တဘာႈ စီပဲန်အ်ုန်ယံမ်းဟာဝ်းအောႏ။
“ခံင်မိုႈအ်ုန်မဝ်းလာ်ဒါ ဒါႈနံင်မဲႈ တာဘြောင်ရဝ် စီပဲန်ပလိက်ကဲ တိုည်းအူန်းအ်ုန်။ ဘံန်ရောတ်ပလူမ်ပလိက် အ်ုန်ဂီုည်ဒါတည်းအ်ုန် တီႈရောင်၊ တာပ်ကဒါႈအ်ုန်ကဲနီန်။ ဂေါႇမိုႈအ်ုန်အာဝ်ဘိူန်းတျံင်အိုမ်ဘာႈ စီပဲန်ဘူရ်ႈလေႈဖါ်ႈတမိုည်ႇအ်ုန် ယံမ်းဟာဝ်း”
ဖုင်ယဲဆျှိုည်ဖီမျေ ဂီုည်ဆီုပ်တခေါရ်ဟာဝ်း ဘည်မိုႈစဲင်စဲင်ဟြဟြ အီကဆီုဝ်ကဆဲင်တောပ် ဂါရ် 2အီး အီယံမ်းဟာဝ်း ဂေါႇပ်ုန်တိုည်းထိင်အူန်း TNLA ကဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
