ဝတ်မှုံ၊ ကျံရ်ေႎှဲပ်ဘျူရီ ဆငည်း 16၊ တော်င်စီး
ဂေါႇမိုႈကဝ်အီဇိူရ်ႈကားနီန် ဒါဘိုတ်ဘြူႈ ဂါရ်ႎါႎည်း 2အီး အီကဇိူရ်ႈကယံင်းကား ပကီုင်းအေးသာယာ လှံင်တော်င်စီး ကပီုန်ဆျှံမ်ကဒါႇက်ြုမ် အ်ုန်အီမိုႈ ဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် စီပဲန် ကဝ်အီမိုႈႎါးအ်ုန် ယံမ်းဖါ်ႈ ကဝ်အီမိုႈႎည်းစီ ကတူႈဟာဝ်းဖေးဆဲဝ်အောႏ။
တိုအီးခေဲင်အရာပ် ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ ခည်ကျံရ်ေႎှဲပ်ဘျူရီ ဆငည်း 14 ခိင်ညှာကပံတ် 9နြီဒိူန် ကဝ်အီဇိူရ်ႈကားနီန် စီတောႇဟာဝ်း ဂါရ်ႎါႎည် အီကဇိူရ်ႈကယံင်းကားဒီန် ယိူဝ်ႇပကီုင်းအေးသာယာ ဟာဝ်းကဒါႇဟဲဟိုး ဒါႈနံင်ကဆွံန်ဒဲႈရိူန်း ဘိူဝ်ရောတ်စာ်မ်းကဒည်ဒေင် အ်ုန်စီဒါလာ်ဘိုတ် ဘြူႈဟာဝ်းဂါရ်အောႏ။
“အ်ုန်ဟောည်ႇတိူရ်ႈဖါ်ႈကား ပကီုင်းအေးသာယာ ခိင်ညှာဇေဝ်း အ်ုန်ဒါႈအ်ုန်အုင်အေ့ ကားဒီန်။ အ်ုန်ဒါႈနံင်ဒဲႈရိူန်း ကဲစီဟာဝ်းကဒါႇ ဟဲဟိုး။ ဂါရ်ကတူႈလိူည်ဘြူႈ ပကဒည်ဒေင်”
ဂါရ်ႎါႎည်ဒီန် ဂါရ်မိုႈအီဂေါည်ပအေးသာယာ ဂေါႇအမှုဘြူဒီန် ကဝ်အီမိုႈႎါး ဟည်ယံမ်းဟာဝ်းဖါ်ႈ ကဝ်အီမိုႈႎည်း စီကတူႈဟာဝ်းဖေးဘာတ်အောႏ။
ဘာည်းလိူည်ဒီန် ခည်ကျံရ်အံက်တိုဘာ ဆငည်း 18 စူန်မှိူဝ် ကပံတ် 5နြီဒိူန် ပကပီုန်ဆျှံမ်ကဒါႇပိူည် ကီုင်းလာဆေဝ်နီန်မာ် ကောန်အီမာည်းအူအီးကာည်း ကောန်အီပ်ုန်အူအီး ဂါရ်အီဒါႈနံင်ဇိူရ်ႈကားဒီန် ဂါရ်ဒါႈနံင်စါမ်းကောႈခံင် စီဘ ဒဝ်လည်လေႈဟာဝ်းပွံတ်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
