ပိုႈလဘား၊ အော်ဂ်ုတ် ဆငည်း 15၊ မန့်ဝိန်း
တိုအီးအရာပ်ဒီန် ကောန်အီမာည်းအူအီး က္လာင်းဒါႈ ကပီုန်ခါင် ခေဲင်လှံင်မံစီ ပမန့်ဝိန်းဒါင်းနီန် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ဂေါႇဘျုင်ဒီန် ကောန်ကညောမ်အူအီး ကာည်း ကောန်အီပ်ုန်အူအီး ယံမ်းဟာဝ်းအောႏ။
အဒိူဝ် ကျံရ်အောဂ်ုတ် ဆငည်း 15 ခီညှာဇေဝ်း ကပံတ် 12 နြီလေႈ 30 မနေတ်ဒိူန် တံပ်ကညာအာဏာဆီုက်ကဲ ပျောႈဟာဝ်းဘျုင် ပေါင် 500 အူပိုင်း ကာည်း ပေါင် 250 နီန် ပကီုင်းမန့်ဝိန်း ခေဲင်ရဝ်ကောင်းခန် ကာည်း ရဝ်ဟိုတုံအော။
အ်ုန်က္လာင်းဒါႈ “ လိူဝ်ႈအာည်ႇဒိူန် ကဲဒေဲႈပျောႈ ပရဝ်ကောင်းခန်နီန် ပေါင် 250 နီန်အာရ်ပိုင်း။ အူကြောင်စီ ကဲပျောႈပေါင် 500 နီန် ပရဝ်ဟိုတုံ။ ပရဝ်ဟိုတုံနီန် အ်ုန်မိူဝ်ႈအေ့ တိုအီးလ”။
ဂေါႇပ်ုန်ပျောႈဟာဝ်းကဲတ ဘျုင်ဒီန် ကောန်ကညောမ် အ်ုန်အီဘိူန်း အဆာက် 8 ဆန်ုမ်အူအီး ကာည်း ကောန်အီပ်ုန် အ်ုန်အီဘိူန်း အဆာက်ကပံတ် 40 ဆန်ုမ်အူအီး ယံမ်းဟာဝ်းအောႏ။
ခည်ဆန်ုမ် 2024 ကျံရ်အံက်တိုဘာ ဆငည်း 27 ဒိူန်မာ် တံပ်ကညာအာဏာဆီာက်ဇေဝ်ကဲ ပျောႈဟာဝ်းဘျုင် ပမန့်ဝိန်းဒါင်းဒီန်အောႏ။
ဘာည်းလိူည်ဒီန် ခီမှိူဝ် ကပံတ် 8 နြီလေႈဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ပအရာပ်ထိင်ခြဲတံပ်ဆီုက်တအာင်း PSLF/TNLA ပမိုဂူႈနီန် တိုအီးအရာပ်ကဲ ယံမ်းဟာဝ်း 10 အီးအာဝ်ယောမ် ကဲအီဘာတ်မာ်ဂီုန်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
