မာည်းဖိူမ်ဆငဲ၊ ကျံရ်အံက်တိုဘာ ဆငည်း 4၊ အိုမ်ယ်ုရ်
ဘည်ဒေဲႈပျောႈဟာဝ်း တံပ်ကညာအာဏာဆီုက်ဇေဝ်ကဲ တပ္လေဘျုင် ခေဲင်ရဝ်တီုင်ဟျော လှံင်အိုမ်ယ်ုရ် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲနီန် ကောန်ကညောမ် 2အီး ယံမ်းဟာဝ်းပွံတ်ဒီဒီန် အူစာ်န်းအောႏ။
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ အဒိူဝ်ကျံရ်အံက်တိုဘာ ဆငည်း 4 ခိင်ဆံန် ကပံတ် 12နြီလေႈဒိူန် ဂေါႇမိုႈ တံပ်ကညာအာဏာဆီုက်ဇေဝ်ကဲ ဒါဖါ်ႈ ယာန်ပ်ုရ်ဂျက် ဒေဲႈပျောႈဟာဝ်းဘျုင် ပေါင် 250နီန် 2ပိုင်း စီပဲန်တောပ်ပည် ကောန်ကညောမ် ကဲအီဂေါည်ပအရာပ်ကဲဒီန် 6အီး 9အီးဘာတ်ဟာဝ်းအောႏ။
“ကဲအီယံမ်းဟာဝ်းဒီန် မိုႈဒိုႇကောန်ကညောမ်။ ကောန်ကညောမ်ယံမ်းဟာဝ်း 2အီး။ ဆာ်မိုႈအီဘာတ်မိုႈ ကောန်ကညောမ် 6အီးကာည်း တိုအီးဒါင်း 3အီး။ ဆာ်မိုႈကောန်အီမာည်း ကောန်အီပ်ုန် ညှံမ်ကကာႈစိ”
ခေဲင်ဘျုင်ပ်ုန်ပျောႈ တံပ်ကညာအာဏာဆီုက်ဇေဝ်ကဲ 2ပိုင်းဒီန် အူပိုင်းဇောႈပဒူႈဖါ်ႈ ခေဲင်ရဝ်တီုင်ဟျော ဆာ်မိုႈအူပိုင်း အ်ုန်ဇောႈကဒူႈ ခနားတီုင်ဟျောကာည်း ဇယ်ဘန်ကောက်အောႏ။
ဆဲႈဒါႇအ်ုန်လတိုအီး အ်ုန်လလူလေဲဝ်ဟာဝ်းဘိုး ဂါင်ဂေါည် 13ကြောင် အာဝ်ယောမ်အောႏ။
ခည်ကျံရ်အံက်တိုဘာ ဆငည်း 2ဒိူန်မာ် ဂေါႇမိုႈတံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်း ပေါင် 500 ခေဲင်ဇံင် 8 ကီုင်းအိုမ်ငျံရ်နီန် အူပိုင်း စီပဲန် တောပ်ပည် အီဒဝ်းႎဲႈဖေးနာန်း တိုအီးယံမ်းဖါ်ႈ 4အီး 7အီး ကတူႈဟာဝ်းဖေးဆဲဝ် ကဆဝ်းအောႏ။
ဘံန်ဟောည်ႇ ထိင်ခြဲ တံပ်ကညာအာဏာဆီုက်ဇေဝ်ကဲ တကီုင်းမာဝ်းႎံင်းနီန် ကဲဂီုည်ဆီုပ်ထိုးဖါ်ႈ ကနာည်နှာင်းႎီရ်ဘိူန်းဒေ ထိင်ခြဲကီုင်းဆဘော ဂေါႇဘည်ဒီန် စီပဲန် ကဲဂီုည်ပျောႈကစံပ်ဟာဝ်း ပ္လေဘျုင် ပဆဘော၊ အိုမ်ယ်ုရ်၊ ရူကော၊ အိုမ်ငျံရ် ကဲအီမိုႈဒီပ်ုန်ထိင်ခြဲအူန်း PSLF/TNLA ကဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
