သတင်းဓာတ်ပုံ
လွေးဇွန်မိုး၊ ရွှေဖီမြေ
တအာင်းဒေသ နမ့်ဆန်မြို့နယ်မှာတော့ ရွှေဖီဦး လက်ဖက်ကို စတင် ခူးဆွတ်နေကြပြီ ဖြစ်ပါတယ်။
၂၀၂၄ ခုနှစ်မှာ ရွှေဖီလက်ဖက်ရွက်စိမ်း တစ်ပိဿာကို ၃,၅၀၀ နဲ့ ၃,၇၀၀ ကြား အမြင့်ဆုံးဈေး ရခဲ့ပြီး ဒီ ၂၀၂၅ ခုနှစ် မတ်လ တတိယအပတ်ကစပြီး နမ့်ဆန်မြို့နယ်က ကျေးရွာတချို့မှာတော့ ရွှေဖီဦးလက်ဖက် ရွက်စိမ်းတစ်ပိဿာကို ၄ ထောင်နဲ့ စတင်ဝယ်ယူနေပြီလို့ သိရပါတယ်။
ရွှေဖီလက်ဖက်ဈေး ၄ ထောင်ကျပ် ရနေပေမဲ့ ၅ ဆကျော် မြှင့်တက်နေတဲ့ ကုန်ဈေးနှုန်းနဲ့ နှိုင်းယှဉ်ရင် လူထုတွေအတွက် တွက်ချေ မကိုက်ဘူးသေးလို့ လက်ဖက်တောင်သူတွေက ပြောဆိုကြပါတယ်။
နမ့်ဆန်မြို့နယ်ထဲက ကျေးရွာတချို့မှာသာ ၄ ထောင် ရရှိနေပြီး ကျေးရွာတချို့မှာတော့ ၃ ထောင်သာ ရနေကြတယ်လို့ ဒေသခံတွေက ရွှေဖီမြေသို့ ပြောပါတယ်။
လက်ဖက်ကို အဓိက စိုက်ပျိုးထုတ်လုပ်တဲ့ နမ့်ဆန်၊ မန်တုံနဲ့ ကျောက်မဲ စတဲ့မြို့နယ်မှာလည်း လက်ဖက် ဈေးကောင်းရဖို့နဲ့ လက်ဖက်အရည်အသွေး ထိန်းသိမ်းဖို့ ရွက်ကြမ်းနဲ့ လက်ဖက်အတု မခူးကြဖို့ကိုလည်း တောင်သူတွေကြား သတိပေး ပြောဆိုနေကြပါတယ်။
