လွေးလာဝ်ဇာရ်၊ ဇူလိုင် ၄ ရက်၊ ဖားကန့်
ကချင်ပြည်နယ် ဖားကန့်မြို့နယ် ရတနာမြေစာပုံ(အမှိုက်ပုံ)ကျေးရွာမှာ လက်နက်ကြီးကျရောက်ပေါက်ကွဲခဲ့တာကြောင့် ဒေသခံ နှစ်ဦး သေဆုံးခဲ့ပြီး ၁၂ ဦး ဒဏ်ရာရခဲ့တယ်လို့ ဖြစ်စဉ်သိရသူ အမျိုးသမီးတစ်ဦးက ရွှေဖီမြေကို ပြောပါတယ်။
ပြိးခဲ့တဲ့ ဇူလိုင် ၂ ရက် ညနေ ၅ နာရီမှာ ရတနာမြေစာပုံ(အမှိုက်ပုံ)ကျေးရွာရဲ့ ဘုန်းကြီးကျောင်းမှာ လက်နက်ကြီးကျရောက်ပေါက်ကွဲခဲ့လို့ သေဆုံးသူနဲ့ ဒဏ်ရာရတဲ့သူတွေရဲ့ အချက်အလက် အသေးစိတ်ကိုတော့ မသိရသေးဘူးလို့ ဖားကန့်မြို့ခံ Tarlin Mg က ဆိုပါတယ်။
“ဒဏ်ရာရတဲ့သူတွေက အမျိုးသား အမျိုသမီးဘယ်လောက် ကလေးငယ်နဲ့ သက်ကြီးပိုင်းတွေ ပါမပါ အဲဒါ မသိရသေးဘူး။ လက်နက်ကြီကျလို့ နှစ်ဦး သေဆုံးတဲ့သူလည်း အမျိုးသားလား အမျိုးသမီးလား မသိရသေးဘူး။ အဲလို ဖြစ်စဉ်ဘဲ သိရတယ်ပေါ့နော်။ သေဆုံးသွားတဲ့ နှစ်ယောက်ကလည်း သဂြိုလ်ရမဲ့ ကိစ္စလည်း မလုပ်ရသေးဘူး။ မရှိသေးဘူး” လို့ ပြောပါတယ်။
လက်နက်ကြီးကျလို့ ဒဏ်ရာရတဲ့ သူတွေဟာ မနေ့ ဇူလိုင် ၃ ရက် မနက်ပိုင်းမှာ ဘုန်းကြီးကားနဲ့ ဆေးရုံပို့လိုက်တာလို့ သိရပါတယ်။
မနေ့ ဇူလိုင် ၂ ရက် ညနေ ၅ နာရီမှာ သေဆုံးထားတဲ့ အလောင်းကို လူမှုကူညီရေး အသင်းတွေကကောက်ဖို့ သွားတဲ့ အချိန်မှာ လက်နက်ကြီးကျအသံ ကြားတော့ မကောက်ဘဲ ပြည်လာခဲ့ရတယ်လို့ နောက်ထပ် ဒေသခံ အမျိုးသားတစ်ဦးဆီက သိရပါတယ်။
“မနေ့ည အမှိုက်ပုံဘက်မှာ ၃ ရက်လောက် သေဆုံးနေတဲ့ အလောင်းကို သွားကောက်ဖို့ အကူအညီတောင်းတယ်။ လူမှုကူညီရေးတွေ ကောက်ဖို့သွားတာ။ ဖားကန့်အထွက်က စစ်တပ်ဂိတ်အကျော်မှာ ရွံ့ဆိုတဲ့ အသံကြားပြီးတော့ ခနဘဲ ကျကွဲသွားတာတဲ့။ အနောက်ပြန်မဆုပ်ဘဲနဲ့ အရှေ့တည့်တည့်သွားလိုက်တာတဲ့။ အဲအလောင်းလည်း မကောက်တော့ဘူး။ ထင်တာတော့ သူတို့ပစ်လိုက်တဲ့ အလုံးက ကျောင်းမှာ သေဆုံးတဲ့ ဒဏ်ရာရတဲ့ သူတွေ ဖြစ်ဖို့များတယ်” လို့ ပြောပါတယ်။
လက်ရှိ ဖားကန့်မှာ ထိတွေ့တိုက်ပွဲမဖြစ်ပေမဲ့ မကြာခဏ ပစ်တဲ့အသံတွေတော့ ကြားနေရတယ်လို့ သူက ပြောပါတယ်။ လုံးခင်းဘက်မှာလည်း ဇူလိုင် ၂ ရက် ညနေမှာ တိုက်ပွဲဖြစ်ပွားခဲ့တယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
