အိုက်ပွီး၊ ဇွန်လ ၈ ရက်၊ သံတွဲ
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် သံတွဲမြို့နယ်က စစ်ဘေးရှောင်စခန်းအပါအဝင် နေရာ ၃ နေရာကို စစ်ကောင်စီတပ် လေကြောင်းကနေ ဗုံးကြဲ တိုက်ခိုက်လို့ အရပ်သား ထိခိုက်သေဆုံးခဲ့တယ်လို့ ဒေသခံတွေဆီက သိရပါတယ်။
မနေ့ ဇွန်လ ၇ ရက် ည ၁၀ နာရီဝန်းကျင်မှာ သံတွဲမြို့ အမှတ် ၈ ရပ်ကွက်နဲ့ စစ်ဘေးရှောင်တွေ ခိုလှုံတဲ့ ကျောက်ကြီးရွာ အထက်တန်းကျောင်း၊ ပုစွန်ဖြေ စာသင်ကျောင်းကို လေကြောင်းနဲ့ ဗုံးကြဲတိုက်ခိုက်သွားတာပဲ ဖြစ်ပါတယ်။
“ဆက်သွယ်ရေး ဖုန်းလိုင်း အင်တာနက်လိုင်းတွေ မရတော့ ထိခိုက်သေဆုံးမှု အရေအတွက် အသေးစိတ် မသိရဘူး။ ဒီနေ့မနက် ကြားရတာ ၃ ယောက်လောက် သေဆုံးတယ်။ ၁၀ ယောက်လောက် ဒဏ်ရာ ရတယ်။ ဒီထက် ပိုများလာနိုင်ပါတယ်” လို့ သံတွဲ ဒေသခံတစ်ဦးက ရွှေဖီမြေသို့ ပြောပါတယ်။
ထိခိုက်သေဆုံးသူတွေဟာ ကျောက်ကြီးရွာ အထက်တန်းကျောင်းနဲ့ ပုစွန်ဖြေ စာသင်ကျောင်းမှာ ခိုလှုံနေကြတဲ့ စစ်ဘေးရှောင်တွေ ဖြစ်ပါတယ်။
ဒါ့အပြင် စစ်ဘေးရှောင်တွေ ခိုလှုံတဲ့ စာသင်ကျောင်းအပါအဝင် အရပ်သား နေအိမ်တချို့လည်း ထိခိုက်ပျက်စီးသွားတယ်လို့ ဆိုပါတယ်။
“မြို့ထဲမှာ ကြဲတဲ့ ဗုံးသီးက စကစ စုဆောင်းရေးအဆောက်အဦး ပျက်စီးတယ်။ လူမနေတော့ ထိခိုက်မှု မရှိဘူး။ စစ်ဘေးရှောင်တွေ ခိုလှုံတဲ့နေရာထဲကျတဲ့ ဗုံးသီးက စာသင်ကျောင်းတွေ ပျက်စီးသွားတယ်။ ပြီးတော့ လူနေအိမ်တချို့ ပျက်စီးသွားတယ်” ဆိုပြီး နောက်ထပ် သံတွဲ ဒေသခံတစ်ဦးက ရွှေဖီမြေသို့ ပြောပါတယ်။
စစ်ကောင်စီက ဇွန်လ ၁ ရက်ကနေ ၃၀ ရက်အထိ နိုင်ငံတစ်ဝန်း ယာယီ ပစ်ခတ်တိုက်ခိုက်မှု ရပ်စဲရေး ကြေညာထားတဲ့ကာလမှာ တိုက်ပွဲ ဖြစ်ပွားခြင်းမရှိဘဲ သံတွဲမြို့နယ်ကို လေကြောင်းကနေ ဗုံးကြဲ တိုက်ခိုက်ခဲ့တာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
