လွေးလာဝ်ဇာရ်၊ ဇွန်လ ၂၉ ရက်
ရှမ်းတောင် မိုင်းရှူး၊ ဝမ်ဟိုင်း၊ ဟိုက်ပုနဲ့ ရှမ်းမြောက် မိုင်းရယ်မြို့နယ်ထဲက မိုင်းဟဒေသနဲ့ တန်းယန့်မြို့နယ်တွေမှာ ကျားဖြန့်(အွန်လိုင်းငွေလိမ်လုပ်ငန်း)တွေ ဆက်လက်ကြီးထွားနေတယ်လို့ ရွှေဖီမြေက စုံစမ်းသိရှိရပါတယ်။
အဲနေရာတွေဟာ စစ်ကောင်စီတပ်နဲ့ ရှမ်းပြည်တိုးတက်ရေးပါတီ SSPP တို့ ထိန်းချုပ်ထားတဲ့ နေရာတွေဖြစ်ပြီး ကျားဖြန့်လုပ်ငန်းတွေ အခုလို ကြီးထွားလာနေတာဟာ ဒေသအာဏာပိုင်တွေရဲ့ သဘောတူညီမှုမရဘဲ လုပ်ကိုင်နေတယ်ဆိုတာ မဖြစ်နိုင်ဘူးလို့ ကျားဖြန့်ကိစ္စနဲ့ ပတ်သက်ပြီး သိရှိသူတစ်ဦးက ရွှေဖီမြေကို ပြောပါတယ်။
“ကျားဖြန့်ကတော့ အရင်လိုဘဲ ဆက်ရှိနေတယ်။ မိုင်းဟမှာ အများဆုံးဘဲ။ မြို့ထဲတော့ မနေဘူး။ တောထဲမှာဘဲ နေတာများတယ်။ သူတို့နေတဲ့နေရာမသိရင် ရှာလို့လည်း မလွယ်ဘူး။ အခုက ဘယ်သူမှ မဖမ်းဘူးလေ။ အခွန်လည်း နှစ်ဖွဲ့စလုံး ဆောင်ထားတာကိုး။ အရင်က ဖမ်းတယ်ဆိုတာလည်း အခွန်မဆောင်လို့ ဟန်ပြဖမ်းတာ။ ပြဿနာရှိမှ ဖမ်းတာ။ ကျားဖြန့်တစ်ဖွဲ့ကို ၃ ရာ ၄ ရာလောက်ရှိတယ်။ အဲထက်များရင်လည်း များနိုင်တယ်”
ကျားဖြန့်လုပ်ငန်း လုပ်ကိုင်ခွင့်ရဖို့ကို SSPP တပ်ထံ ကျားဖြန့်လုပ်ကိုင်သူတစ်ဦးအတွက် တစ်လကို ယွမ် ၄ ထောင် (သိန်း ၂၀ ကျော်) ပေးရပြီး စစ်ကောင်စီတပ်ကိုတော့ ဘယ်လောက်ပေးဆောင်ရတယ်ဆိုတာကိုတော့ မသိရဘူးလို့ ဆိုပါတယ်။
ကျားဖြန့်ကိစ္စနဲ့ ပတ်သက်ပြီး အချက်အလက်အသေးစိတ်သိရဖို့ SSPP တပ်ရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ရွှေဖီမြေက ဖုန်းဆက်သွယ်တာနဲ့ စာပို့ ဆက်သွယ်ခဲ့ပေမယ့် မရခဲ့ပါဘူး။
စစ်ကောင်စီတပ်နဲ့ SSPP တပ်တို့ဟာ ၎င်းတို့ ထိန်းချုပ်နယ်မြေတွေမှာ ကျားဖြန့်လုပ်ကိုင်သူတွေကို ဖမ်းဆီးပြတာမျိုး လုပ်ကိုင်နေပေမယ့် တကယ့်မြေပြင်မှာတော့ ၎င်းတို့ ထိန်းချုပ်ဒေသတွေမှာ ကျားဖြန့်လုပ်ငန်းက ပိုမိုကြီးထွားလာနေတာ ဖြစ်ပါတယ်။
ပြီးခဲ့တဲ့ မတ်လ ၂၃ ရက်မှာလည်း မိုင်းရှူးမြို့နယ်မှာ ကျားဖြန့်လုပ်ကိုင်တဲ့ တရုတ်နိုင်ငံသားအပါအဝင် ဖုန်းနဲ့ ကွန်ပျူတာ စတဲ့ကျားဖြန့်သုံးပစ္စည်းတွေ သိမ်းဆည်းထား ရရှိခဲ့တယ်လို့ SSPP/SSA က သတင်းထုတ်ပြန်ခဲ့ပါတယ်။
အလားတူ စစ်ကောင်စီထိန်းချုပ်မှုအောက်ရှိနေတဲ့ မူဆယ်မြို့မှာလည်း စစ်ကောင်စီတပ်က ကျားဖြန့်ရုံတွေ ဝင်ရောက်စီးနင်းတာတွေ လုပ်ဆောင်နေပြီး ၎င်းတို့ ဝင်ရောက်စီးနင်းတဲ့ ရုံတွေဟာ လိုင်းကြေးပေးဆောင်ခြင်း မရှိတဲ့ ရုံတွေသာဖြစ်တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ၂ဝ၂၄ နိုဝင်ဘာ ၂၀ ရက်မှာ လူအင်အား ၅၀၀ ရှိတဲ့ တရုတ်ကျားဖြန့်အဖွဲ့က တန့်ယန်းမြို့နယ် မန်ကတ်ရွာအနီးက ကာချတ်ရွာကို ရောက်ရှိလာတယ်လို့ ဒေသခံတွေက ရွှေဖီမြေကို ပြောဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
